भंडारा - विविध शासकीय योजनांचा फायदा मिळवून देते, असे सांगून वयोवृद्ध महिलांना लुटणाऱ्या आरोपी महिलेला तुमसर पोलिसांनी अटक केली आहे. वृद्ध महिलांना लुटल्याची कबुली आरोपी महिलेने दिली आहे.
मागील तीन महिन्यात तुमसरमध्ये वयोवृद्ध महिलांची शासकीय योजनांच्या नावाने फसवणूक करण्याच्या घटनेत वाढ झाली होती. पोलिसांनी आरोपी महिलेचा शोध घेण्यास सुरुवात केली. विविध सीसीटीव्ही कॅमेऱ्याच्या माध्यमातून आणि गुप्त माहितीच्या आधारावर पोलिसांनी गोंदिया जिल्ह्यातील कुटीपार गावातील 49 वर्षीय निशिगंधा उर्फ ज्योती गोपीचंद रामटेके या महिलेला तिच्या राहत्या घरून अटक केली.
तुमसर येथील सुलोचना घोडीचोर या 60 वर्षीय वृद्ध महिलेला एका सार्वजनिक कार्यक्रमात आरोपी महिला भेटली. श्रावण बाळ योजनेचे तुला लाभ मिळतो का? असे विचारले. त्यानंतर मी तुला 1 लाख 80 हजार रुपये मिळवून देते, असे सांगितले. यावर विश्वास ठेवून फिर्यादीने तिच्याकडील 14 हजार रुपये व 3 ग्रॅम सोन्याची गरसुळी दिली. त्यानंतर तुझा अर्ज घेऊन येते, असे सांगून आरोपी महिला निघून गेली. त्यानंतर आरोपी महिला परत न आल्याने आपली फसवणूक झाल्याचे लक्षात येताच फिर्यादी महिलेने तुमसर पोलीस स्थानकात तक्रार नोंदवली.
याचप्रकारे आरोपी निशिगंधा हिने एका वृद्ध महिलेलादेखील पतीच्या मृत्युचे 40 हजार रुपये व तुला 20 हजार रुपये मिळवून देते, असे सांगून तिच्याकडून दागिने उकळले होते. तर एका वृद्ध महिलेला विधवा योजनेचे पैसे मिळवून देते, असे सांगून तिच्याकडील दागिने लुटूले होते. याचबरोबर शासनाकडून बांधकाम साहित्याची पेटी मिळाली आहे. त्यातील 8 हजार रुपये मिळवून देते, असे एका महिलेला सांगून तिच्याकडील दागिने सुद्धा या आरोपी महिलेने लुबाडून नेले होते.
वृद्ध महिलांना लुबाडणाऱ्या आरोपी महिलेविरुद्ध 550/ 19 कलम 420 भा.द.वि नुसार गुन्हा दाखल करण्यात आला आहे. अशा पद्धतीची फसवणूक जिल्ह्यातील विविध तालुक्यात यापुर्वीही झाली होती. या सर्व घटनांमध्ये या महिलेचे काही संबंध आहेत का किंवा हिचा कोणत्या टोळीशी संबंध आहे का, याचा तपास सध्या पोलीस करीत आहे.
