भंडारा - मला पक्षातील काही लोकांनी तुरुंगात घातले. ज्या लोकांनी माझ्याविरुद्ध हे षड्यंत्र रचले त्यांचे नाव पोलीस तपासानंतर आणि न्यायालयाच्या निर्णयानंतर पुढे येईलच. माझ्यावर विनयभंगाचा आरोप एका महिला पोलीस उपनिरीक्षकांनी केला. तर मला अटक करणाऱ्या महिला उपविभागीय पोलीस अधिकाऱ्यांनी सांगितले की, माझ्याविरुद्ध विनयभंगाचा गुन्हा नाही. पोलिसांमध्ये मतभेद असल्यामुळे हे स्पष्ट दिसत आहे की हा माझ्याविरुद्ध रचलेले कट-कारस्थान आहे. यामध्ये पोलीस विभागाचे अधिकारी आणि काही राजकीय पदाधिकाऱ्यांचा समावेश आहे, असा आरोप चरण वाघमारेंनी केला आहे.
विनयभंगाच्या आरोपावरून अटक झालेल्या आमदार चरण वाघमारे यांनी अटकेनंतर जामीन न घेण्याचे निर्णय घेतला होता. मात्र, अटकेनंतर पालकमंत्री परिणय फुके, खासदार सुनील मेंढे आणि म्हाडाचे अध्यक्ष तारीख कुरेशी यांनी तुरूंगात वाघमारे यांची भेट घेतल्यानंतर त्यांना मुख्यमंत्री आणि गडकरींचा संदेश दिला. मुख्यमंत्री आणि गडकरी यांनी मला जामीन घेण्यासाठी विनंती केली. वरिष्ठांच्या विनंतीला मान देऊनच मी जामीन अर्जावर स्वाक्षरी केली असल्याचे चरण वाघमारे यांनी सांगितले.
हेही वाचा - विनयभंग प्रकरणातील भाजप आमदार चरण वाघमारेंची सुटका
तुमसर विधानसभा क्षेत्रातून माझे तिकीट सहजासहजी कापता येत नव्हते म्हणून अशा पद्धतीचे षड्यंत्र माझ्याविरुद्ध रचले गेले आहे, असे आमदार चरण वाघमारे यांनी सांगितले. गृहमंत्री तुमचा मुख्यमंत्री तुमचा आणि तुम्ही विद्यमान आमदार असतानाही पोलीस तुमच्यावर खोटे आरोप कसे लावू शकतात असे विचारले असता त्यांनी सांगितले, मी सदैव पोलिसांच्या अन्यायाविरुद्ध उभा राहतो. त्यामुळे पोलिसांना संधी मिळताच त्यांनी अशा पद्धतीचे खोटे आरोप माझ्याविरुद्ध लावले. पहिल्या यादीत माझे नाव नसले तरी पुढच्या यादीत मला उमेदवारी मिळणार, असा विश्वास आहे. मी भाजपचा तुमसर विधानसभा क्षेत्रातून उमेदवार असेल, असे सांगताना जर तिकीट मिळाले नाही तर कार्यकर्त्यांच्या इच्छा जाणून अपक्ष निवडणूक लढण्याचा विचार करेन, असेही आमदार चरण वाघमारे यांनी सांगितले.
हेही वाचा - भाजप आमदार चरण वाघमारे यांनी कारागृहातूनच भरला उमेदवारी अर्ज
