भंडारा - 'भाताचा जिल्हा' म्हणुन प्रसिद्ध असलेल्या भंडारा जिल्ह्यात सेंद्रिय शेतीचे पुरस्कर्ते असलेल्या शेतकऱ्यांनी स्वखर्चाने तांदूळ आणि धान्य महोत्सवाचे आयोजन केले आहे. कृषी विभागाने महोत्सवासाठी निधी नसल्याचे सांगितल्यामुळे या शेतकऱ्यांना हे पाऊल उचलावे लागले. 'सुरगंगा तांदूळ व धान्य कृषी महोत्सव' असे या महोत्सवाचे नाव आहे. तालुका कृषी अधिकारी कार्यालयाच्या आवारात, १० ते १५ जानेवारीदरम्यान हा महोत्सव असणार आहे.
जिल्ह्यातील अकरा शेतकरी प्रोडूसर कंपनीच्या शेतकऱ्यांनी एकत्रित येऊन हा तांदूळ महोत्सव सुरू केला आहे. जिल्ह्यातील नागरिकांना सेंद्रिय तांदूळ कमी किंमतीत मिळावा, तसेच शेतकऱ्यांचा तांदूळ मध्यस्थ व्यापाऱ्याजवळ न जाता, थेट ग्राहकांना मिळावा या उद्देशाने हे शेतकरी एकत्रित आले आहे. या तांदूळ महोत्सवात सेंद्रिय शेतीत पिकवलेल्या काळा तांदूळ, ब्राउन राईस, केसर, शुगर-फ्री राईस, जय श्रीराम, आंबेमोहर आणि सुगंधित चिन्ह यांसारख्या विविध प्रजातींचे तांदूळ एकाच ठिकाणी मिळत असल्याने ग्राहक सुद्धा आनंदित आहेत.
दरवर्षी कृषी विभागामार्फत अशा पद्धतीच्या तांदूळ महोत्सवाचे आयोजन केले जाते. मात्र, यावर्षी त्यांच्याकडे निधी नसल्याचे त्यांनी शेतकऱ्यांना सांगितले होते. तरीही, शेतकऱ्यांनी हार न मानता स्वतः एकत्रितपणे पैसे गोळा केले, आणि तांदूळ महोत्सवाचे आयोजन केले.
बहुतांश शेतकरी कमी दिवसांमध्ये, कमी जागेत जास्तीत जास्त उत्पादन घेण्याच्या शर्यतीत मोठ्या प्रमाणात रासायनिक खताचा उपयोग करतात. याचा दुष्परिणाम म्हणजे, खाण्याच्या माध्यमातून आपल्या सर्वांच्या पोटात विष जाते. बऱ्याच जागरुक नागरिकांना सेंद्रिय शेतीत उत्पादित झालेले तांदूळ हवे असतात. मात्र त्यांना ते सहजरीत्या मिळत नाहीत. अशा सर्व ग्राहकांसाठी हा तांदूळ महोत्सवाचे आयोजन हे दिलासादायक आहे. तसेच मधल्या व्यापाऱ्याकडून नाही, तर थेट विक्री होत असल्यामुळे शेतकरीही आनंदी आहेत.
हेही वाचा : 'कोट्यवधीचा निधी खर्च झालाय.. सिंचन घोटाळ्याचे सत्य पुढे आलेच पाहिजे'
