बीड Manoj Jarange Patil : मराठा आरक्षण आंदोलनाबाबत (Maratha Reservation Protest) पुढील दिशा ठरवण्यासाठी मनोज जरांगे पाटील यांनी शनिवारी (23 डिसेंबर) बीडमध्ये (Manoj Jarange Patil Beed Sabha) मराठा समाजाच्या सभेला संबोधित केलं. यावेळी त्यांनी राज्य सरकारला इशारा दिलाय. येत्या 20 जानेवारीपासून मुंबईतील आझाद मैदानावर आमरण उपोषण सुरू करणार असल्याची घोषणा मनोज जरांगे पाटील यांनी केली.
मुंबईत आमरण उपोषण : मुंबईत 18 जानेवारीपर्यंत कलम 144 लागू करण्यात आले आहे. त्यामुळं 20 जानेवारीला मुंबईत आमरण उपोषण सुरू करणार आहे. त्यामुळं तुम्ही सर्वांनी मला भेटायला मुंबईत यायचं आहे. .आझाद मैदानातून मराठा आरक्षणासाठी निर्णायक आमरण उपोषणाची घोषणा केली आहे. मनोज जरांगे पाटील यांनी 20 जानेवारीपासून आझाद मैदानात आमरण उपोषणाची घोषणा करतानाच स्वत: त्यांच्या आंतरवाली सराटीतून पायी मुंबईकडे प्रस्थान करणार आहेत.
अंतरवलीमधून मुंबईला पायी जाणार : अंतरवली सराटीतून मुंबईकडं पायी निघणार असल्याची घोषणा मनोज जरांगे पाटील यांनी केली. देव जरी आडवा आला तरी मराठ्यांना ओबीसीतूनच आरक्षण घेणार आहे. जातीपेक्षा मोठा नेता मानू नका,आपली मतं घेण्यापुरता दारी आला तर त्याला चपलेने बडवा. पोरांना अटक झाली तर आमदार आणि मंत्र्यांच्या घरी जावून बसा, असं आवाहन जरांगे पाटील यांनी केलं. दहा बारा दिवस मिळत आहेत ते सरकारनं बघावं. एकदा अंतरवलीमधून निघालो तर पुन्हा आरक्षण मिळेपर्यंत परत येणार नाही, असा इशारा मनोज जरांगे पाटील यांनी राज्य सरकारला दिलाय.
हिंसा करायची नाही : पायी मुंबईला जाताना वाटेत लोक सोबत येतील, मुंबईकडं कूच करतील. मुंबईला येताना कुणीही हिंसा करायची नाही, मराठ्यांना कोणताही डाग लागू द्यायचा नाही. कुणीही जाळपोळ, तोडफोड करायची नाही. शांततेत जायचं, शांततेत यायचं. जो हिंसा करेल तो आपला नाही, हिंसा करणाऱ्यांना पकडून द्या. मराठा आरक्षण घेतल्याशिवाय मागं यायचं नाही, असं मनोज जरांगे पाटील म्हणाले.
हेही वाचा -
