सिल्लोड येथील 'त्या' महिलेवर पोलीस बंदोबस्तात अंत्यसंस्कार

सिल्लोड तालुक्यातील जळीतकांड प्रकरणातील महिलेचा उपचारादरम्यान मृत्यू झाला. गुरुवारी या महिलेवर पोलीस बंदोबस्तात अंत्यसंस्कार करण्यात आले. अंत्यसंस्काराच्या वेळी अनुचित प्रकार घडू नये, म्हणून अंधारी गावात मोठा पोलीस बंदोबस्त ठेवण्यात आला होता.

औरंगाबाद - सिल्लोड तालुक्यात अंगावर रॉकेल टाकून महिलेला जाळण्याची घटना घडली होती. या घटनेतील महिलेचा उपचारादरम्यान मृत्यू झाला. गुरुवारी या महिलेवर पोलीस बंदोबस्तात अंत्यसंस्कार करण्यात आले. या प्रकरणातील आरोपीला फाशीची शिक्षा देण्यात यावी, अशी मागणी महिलेच्या मुलीसह संतप्त नातेवाईकांनी केली.

रविवारी रात्री 11 वाजेच्या सुमारास 50 वर्षीय पीडित महिला घरात झोपलेली असताना आरोपी संतोष सखाराम मोहिते याने घराची कडी वाजवली. महिलेने दरवाजा उघडताच तो आत घुसला. त्यावर महिलेने 'तू रात्री माझ्या घरी येत जाऊ नको, माझी बदनामी होते', असे म्हणत त्याला घरातून बाहेर काढण्याचा प्रयत्न केला. यातून दोघांमध्ये भांडण झाले. त्यानंतर आरोपीने पीडितेला मारहाण करत अंगावर रॉकेल टाकून पेटवून दिले.

हेही वाचा - हिंगणघाट जळीतकांड : 'कठोर कायद्यासाठी गृह विभागाला सूचना करणार'

पीडित महिलेवर औरंगाबाद येथील घाटी रुग्णालयात उपचार सुरू होते. उपचारा दरम्यान बुधवारी रात्री तिचा मृत्यू झाला. या प्रकरणी सिल्लोड ग्रामीण पोलीस ठाण्यात आरोपी विरुध्द विविध कलमांखाली गुन्हा दाखल करण्यात आला आहे. दरम्यान, महिलेच्या मृत्यूनंतर आरोपी विरुध्द खुनाचा गुन्हा दाखल करण्यात आला आहे, अशी माहिती सहायक पोलीस निरीक्षक किरण बिडवे यांनी दिली.

गावाला छावणीचे स्वरुप -
अंत्यसंस्काराच्या वेळी अनुचित प्रकार घडू नये, म्हणून गावात मोठा पोलीस बंदोबस्तात ठेवण्यात आला होता. अप्पर पोलीस अधीक्षक गणेश गावडे, उपविभागीय पोलीस अधिकारी सुदर्शन मुंढे, सहायक पोलीस निरीक्षक किरण बिडवे, किरण आहेर, सिताराम म्हैत्रे यांच्यासह आरसीपीची एक तुकडी तैनात करण्यात आली होती. यामुळे गावाला छावणीचे स्वरुप आले होते.

फाशीची शिक्षा देण्याची मागणी -
या प्रकरणातील आरोपीला फाशी शिक्षा देण्यात यावी, खटल्याच्या सुनावणीसाठी उज्ज्वल निकम यांची नियुक्ती करावी, पीडितेच्या कुटुंबीयांना 25 लाखांची मदत द्यावी, कुटुंबीयांचे पुनर्वसन करण्यात यावे, पीडितेच्या मुलीला शासकीय नोकरी देण्यात यावी, समाजाला स्वसंरक्षणासाठी शस्त्र परवाना देण्यात यावा या मागण्या महिलेच्या नातेवाईकांनी केल्या.