औरंगाबाद - निवडणुकीत पडण्याऐवजी मी मेलो का नाही? असा संवेदनशील प्रश्न शिवसेना नेते चंद्रकांत खैरे यांनी शिवसैनिकांना विचारला. माझे काय चुकले शिवसैनिक का नाराज झाला, असा प्रश्न उपस्थित करत, मी ही शेवटची निवडणूक लढवणार होतो. या निवडणुकीनंतर देशात शिवसेनेचा प्रचारक म्हणून काम करणार होतो. मी शिवसेना पक्षप्रमुखांकडे हे बोलून दाखवले होते, असे मत खैरे यांनी उपस्थित केले.
औरंगाबाद जिल्ह्यात शिवसेनेचा ३४ वा वर्धापन दिवस साजरा करण्यात आला. या कार्यक्रमासाठी पालकमंत्री एकनाथ शिंदे, शिवसेना नेते विनोद घोसाळकर, मनीषा कायंदे यांच्यासह शिवसेनेचे पदाधिकारी आणि कार्यकर्ते उपस्थित राहिले होते.
लोकसभा निवडणुकीत शिवसेनेचे नेते चंद्रकांत खैरे यांचा एमआयएमने पराभव केला. चंद्रकांत खैरे पाचव्यांदा निवडणूक लढवत असताना त्यांचा धक्कादायक पराभव झाला. या पराभवानंतर चंद्रकांत खैरे यांनी पहिल्यांदा जाहीर कार्यक्रमात आपल्या भावना व्यक्त केल्या. मी खासदार असताना काम केली नाही अशी ओरड केली गेली. मात्र, माझ्याकडे कामाची यादी आहे. माझी काय चूक झाली? आता अनेकजण रडत आहेत, पण आता काय करणार. पराभवानंतर मातोश्रीवर गेलो त्यावेळी उद्धव ठाकरे यांच्यासह रश्मी ठाकरे देखील भावनिक झाल्या होत्या.
त्यावेळी मी म्हणालो होतो की, 'झालं ते झालं सर्वाना माफ करा.' कळायला हवं होत. मात्र, आता शिवसेनेची बैठक घेऊन बदल केले पाहिजे अशी भावना चंद्रकांत खैरे यांनी व्यक्त केली. मी निवडणून आलो असतो तर शहराला मंत्रिपदाचा मान मिळणार होता, तो आता गेला. ज्यांना मोठे केले तेच लोक विरोधात गेले. शिवसेनेचा नेता हे मोठे पद असून काही चुकले असल्यास माफ करा असे म्हणत खैरे यांनी आपल्या भावना व्यक्त केल्या.
