औरंगाबाद - डॉ. बाबासाहेब आंबेडकर मराठवाडा विद्यापीठाच्या कुलगुरूपदी डॉ. प्रमोद गोविंदराव येवले यांची नियुक्ती करण्यात आली आहे. ते राष्ट्रसंत तुकडोजी महाराज नागपूर विद्यापीठाच्या प्र-कुलगुरुपदावर कार्यरत आहेत. राज्यपाल तथा कुलपती सी. विद्यासागर राव यांनी सोमवारी डॉ. प्रमोद येवले यांच्या नियुक्तीची घोषणा केली. विद्यापीठाचे कुलगुरु डॉ. बी. ए. चोपडे यांचा कार्यकाळ ३ जून २०१९ रोजी संपल्यामुळे हे पद रिक्त झाले होते.
कोल्हापूर येथील शिवाजी विद्यापीठाचे कुलगुरु डॉ. देवानंद शिंदे यांच्याकडे डॉ.बाबासाहेब आंबेडकर मराठवाडा विद्यापीठाच्या कुलगुरु पदाचा अतिरिक्त कार्यभार सोपवण्यात आला होता.
डॉ. येवले यांनी औषधनिर्माणशात्र विषयात पीएच.डी. प्राप्त केली असून त्यांना अध्यापन, संशोधन व प्रशासनाचा व्यापक अनुभव आहे. जून २०१५ साली त्यांची राष्ट्रसंत तुकडोजी महाराज नागपूर विद्यापीठाच्या प्र-कुलगुरुपदी नियुक्ती करण्यात आली होती.
विद्यापीठाच्या कुलगुरूंच्या नियुक्तीसाठी राज्यपालांनी सर्वोच्च न्यायालयातील सेवानिवृत्त न्या. अनिल दवे यांच्या अध्यक्षतेखाली निवड समिती गठीत केली होती. नॅशनल इनस्टिट्युट ऑफ टेक्नॉलॉजी, दिल्ली या संस्थेचे संचालक प्रवीण कुमार तसेच शासनाचे प्रधान सचिव भूषण गगराणी हे या निवड समितीचे सदस्य होते.
