औरंगाबाद - राजकीय आणि सामाजिकदृष्ट्या संवेदनशील अशी ओळख असलेल्या औरंगाबाद शहरात २०१४ च्या विधानसभा निवडणुकीत मोठा राजकीय भूंकप झाला. आधी काँग्रेस आणि नव्वदच्या दशकानंतर शिवसेनेचा बालेकिल्ला अशी औरंगाबादची ओळख! पण २०१४ च्या निवडणुकीनंतर सगळीच गणिते बदलली.
केवळ हैदराबाद आणि आजूबाजूच्या परिसरात अस्तित्त्व असलेला एआयएमआयएम अर्थात मजलिस-ए-इत्तेहादूल मुसलमीन या पक्षाने मुंबईच्या भायखळा आणि औरंगाबाद मध्य अशा दोन विधानसभा मतदारसंघात विजय मिळवत आपले दोन आमदार पहिल्यांदा महाराष्ट्र विधानसभेत पाठवले. भायखळ्यातून अॅड. वारीस पठाण तर औरंगाबाद मध्य मतदारसंघातून पुर्वाश्रमीचे पत्रकार असलेल्या सय्यद इम्तियाज जलिल यांनी विजय मिळवला. महाराष्ट्राच्या राजकारणातील हे मोठे स्थित्यंतर होते. पुर्णपणे मुस्लिम तोंडवळा असलेला हा पक्ष महाराष्ट्राच्या राजकीय पटलावर आला होता.
हेही वाचा : उद्धव ठाकरे म्हणतात आमचं ठरलंय, पण पाटील म्हणतात अजून ठरायचंय
एआयएमआयएमने विजय मिळविलेल्या दोन विधानसभा मतदारसंघापैकी एक होता मुंबईतील भायखळा विधानसभा आणि औरंगाबाद शहरातील तीनपैकी एक असलेला औरंगाबाद मध्य विधानसभा मतदारसंघ. २०१४च्या निवडणुकीपर्यंत येथे शिवसेनेचा उमेदवार निवडून येत होता. अपवाद २००९ च्या निवडणुकीत शिवसेनेने विकास जैन यांना उमेदवारी दिल्यामुळे मराठवाड्यातील निष्ठावंत शिवसैनिक अशी ओळख असलेल्या प्रदीप जैस्वाल यांनी बंडखोरीचे निशान फडकवत आमदारकीची निवडणूक लढवली होती. आणि अपक्ष उमेदवार म्हणून विजयही मिळवला होता. अखेर पाच वर्षाच्या आतच बंडखोरीची तलवार म्यान करत २०१४ च्या निवडणुकीत त्यांनी शिवसेनेचा भगवा खांद्यावर घेतला. आणि शिवसेनेचे उमेदवार म्हणून विजय मिळवला. दरम्यान या निवडणुकीपुर्वी काँग्रेस-राष्ट्रवादी आघाडी आणि शिवसेना-भाजप युतीने स्वतंत्ररीत्या निवडणूक लढवण्याचा निर्णय जाहीर केला होता. आणि या मतदारसंघाची गणिते बदलली. सिंधी, गुजराती, मारवाडी हे हिंदू व्यापारी समूह आणि मुस्लीम अशा मिश्र लोकसंख्येचा हा मतदारसंघ. पारंपरिकदृष्ट्या शिवसेनेच्या पाठीमागे ठामपणे उभा राहणारा हा परिसर.
