औरंगाबाद - जिल्ह्यात कोरोनाची वाढती रुग्णसंख्या पाहता खबरदारीचे उपाय म्हणून 3 दिवसांचा कडकडीत बंद पाळण्याचा निर्णय घेण्यात आला आहे. त्यानुसार आज (शुक्रवार) पासून पुढील 3 दिवस पूर्ण व्यापार शंभर टक्के बंद ठेवण्यात आला आहे.
यामधून वैद्यकीय सेवेला सूट देण्यात आली आहे. ज्या ठिकाणी दवाखाना आहे, त्या ठिकाणची औषधी दुकाने 24 तास सुरु असणार आहेत. तर बाजार पेठेत असलेली औषधी दुकाने दुपारी 2 पर्यंतच सुरु ठेवण्याचा निर्णय घेण्यात आला असून त्याची अंमलबजावणी आज पासून करण्यात आली आहे.
औरंगाबादेत गेल्या 4 दिवसांमध्ये कोरोनाच्या रुग्णसंख्येत मोठी वाढ झाली आहे. 4 दिवसांपूर्वी 53 रुग्णसंख्या असताना 4 दिवसांत ही रुग्णसंख्या 177 वर पोहचली आहे. कोरोनाचे हॉटस्पॉट देखील वाढत असल्याने पुढील काही दिवस कडक लॉकडाऊन पाळण्याचा निर्णय घेण्यात आला आहे. व्यापारी महासंघाने 3 दिवस पूर्ण व्यापार बंद ठेवण्याचा निर्णय घेतला आहे. त्यानुसार औरंगाबादचा जुना आणि नवीन मोंढा भाग 3 मे पर्यंत बंद ठेवण्याचा निर्णय घेण्यात आला आहे. या बंदमध्ये वैद्यकीय सेवेला सूट देण्यात आली आहे.
