अमरावती - जिल्ह्यातील धामणगाव रेल्वे येथे भर दुपारी चोरट्याने दुचाकी चोरुन नेल्याची घटना घडली आहे. येथील कृषी उत्पन्न बाजार समिती परिसरातून घरासमोर उभी असलेली दुचाकी चोरीला गेली. चोरीचा संपूर्ण प्रकार सीसीटीव्हीमध्ये कैद झाला आहे. या प्रकरणी आता दत्तापूर पोलीस चोरट्याचा शोध घेत आहे.
धामणगाव रेल्वे येथील नरेंद्र जयस्वाल याची दुचाकी शनिवारी दुपारच्या सुमारास त्यांच्या घरासमोर उभी होती. जयस्वाल दुपारी घरी आले असता गडबडीत गाडीची चावी काढायचे विसरून गेले होते. या दरम्यान अज्ञात भामट्याचे लक्ष गाडीकडे गेले. बराच वेळ परिसराची रेकी केल्यानंतर त्याने गाडी चोरली. ही संपुर्ण घटना सीसीटीव्हीत कैद झाली आहे.
घराबाहेर गाडी न दिसल्याने त्यांनी सीसीटीव्हीची तपासणी केली. कॅमेऱ्यामध्ये त्यांना गाडी चोरून नेल्याचे दिसून आले. याप्रकरणी जयस्वाल त्यांनी पोलीस स्टेशनमध्ये चोरीची तक्रार दिली आहे. पोलीस पुढील तपास करत आहेत. भरदिवसा वर्दळीच्या ठिकाणांहून दुचाकी चोरी गेल्याने चोरट्यांना पोलिसांचा धाक उरला नसल्याचे दिसून येत आहे.
