अमरावती - हरीसालच्या वन परिक्षेत्र अधिकारी दीपाली चव्हाण आत्महत्या प्रकरणात आरोपी असणाऱ्या वरिष्ठ अधिकाऱ्यावर कारवाई व्हावी, या मागणीसाठी भाजपच्यावतीने जिल्हा सामान्य रुग्णालयाच्या शवविच्छेदन गृहासमोर ठिय्या देण्यात आला आहे.
उपवनसंरक्षक व अपर प्रधान मुखवन सारक्षकांवर कारवाई व्हावी -
आपल्या कर्मचाऱ्यांना भ्रष्टाचारासाठी प्रवृत्त करणाऱ्या आणि आपली मर्जी राखली गेली नाही तर छळ करण्याचा प्रकार दीपाली चव्हाण आत्महत्त्या प्रकरणाने समोर आला आहे. या प्रकारणात उपवनसंरक्षक विनोद शिवकुमार हे दोषी असल्याचे दीपाली चव्हाण यांनी आत्महत्त्या करण्यापूर्वी लिहिलेल्या पत्रात म्हटले आहे. तसेच विनोद शिवकुमार याच्यावर अपर प्रधान मुख्य वनसंरक्षक श्रीनिवास रेड्डी यांचा हात असल्याचे म्हटले आहे. या दोन्ही अधिकाऱ्यांविरोधात वन कर्मचाऱ्यांमध्ये रोष उफाळून आला असता संबंधित अधिकाऱ्यांवर त्वरित कारवाई करावी, अशी मागणी भाजपच्यावतीने करण्यात आली आहे.
माजी आमदार आणि भाजप नेते डॉ. सुनील देशमुख यांच्या नेतृत्वात शव विच्छेदन गृहासमोर भाजपा करीकर्त्यांनी ठिय्या दिला. भाजपचे प्रदेश प्रवक्ता शिवराय कुळकर्णी, भाजपच्या जिल्हाध्यक्ष निवेदिता चौधरी, नगरसेवक सुरेखा लुंगारे, यांच्यासह दीपाली चव्हाण यांचे नातेवाईक तसेच जिल्ह्यातील वन परिक्षेत्र अधिकारी आणि कर्मचारी मोठ्या संख्येने जमल्याने इर्विन चौक ते रेल्वेस्टेशन मार्ग बंद करण्यात आला. कुठलाही अनुचित प्रकार घडू नये, यासाठी शवविच्छेदन गृहासमोर पोलिसांना कडेकोट बंदोबस्त होता.
काय आहे दिपाली चव्हाण आत्महत्या प्रकरण -
दीपाली चव्हाण या मेळघाट व्याघ्र प्रकल्पातील गुगामल वन्य विभागात कार्यरत होत्या. दीपाली चव्हाण यांनी काल त्यांच्या शासकीय निवासस्थानी स्वतःवर गोळी झाडून आत्महत्या केली होती. आत्महत्या करण्यापूर्वी त्यांनी चार पाणी सुसाइड नोट लिहिली होती. ती नोट पोलिसांनी जप्त केली असून त्याच आधारे पोलिसांनी उपवनसंरक्षक विनोद शिवकुमार यांना अटक केली आहे. वन अधिकारी दीपाली चव्हाण यांनी आत्महत्या करण्यापूर्वी लिहिलेल्या सुसाइड नोटमध्ये शिवकुमार यांच्यावर गंभीर आरोप केले आहेत. विनोद शिवकुमार हे शारीरिक आणि मानसिक छळ करत असल्याचे त्यामध्ये नमूद करण्यात आले आहे. शिवकुमार यांनी कमीपणा दाखवण्यासाठी माझ्या कामात जाणीवपूर्वक चुका काढायचे. मी गर्भवती असताना मला सुट्टी नाकारून रस्त्यावर फिरवले, ज्यामुळे माझा गर्भपात झाला. ते मला अश्लील भाषेत बोलायचे. रात्रीच्या वेळी कुठेही भेटायला बोलवायचे. यासंदर्भात वरिष्ठांसह खासदार नवनीत राणा यांच्याकडेही तक्रार केली. मात्र काहीही उपयोग झाला नसल्याचे सुसाइड नोटमध्ये नमूद आहे.
हेही वाचा - दीपाली चव्हाण आत्महत्याप्रकरणी शिवकुमार अटकेत
