सायकल पंचर होते म्हणून 'हा' पठ्या चक्क घोड्यावरून जातो शाळेत, वाचा...

सायकल पंचर होते म्हणून मेळघाटातील एक विद्यार्थी घोड्यावरून शाळेत येतो. विशेष म्हणजे त्याला शाळेत येण्यासाठी गुरुजींनीदेखील परवानगी दिली आहे.

अमरावती - पाठीच्या मणक्याचा त्रास असल्याने शासकीय कार्यालयात ड्युटीवर येण्यासाठी नांदेडमधील रोजगार हमीच्या कार्यालयातील सतीश देशमुख या सहाय्यक लेखाधिकाऱ्याने चक्क घोड्यावरून कार्यालयात येण्यासाठी परवानगी मागितली होती. परंतु या अजब मागणीने त्यांना घोड्यावरून येण्यासाठी जिल्हाधिकारी यांनी परवानगी नाकारली होती. असे असले तरी अमरावतीच्या मेळघाटमधील एका पठ्ठ्याला घोड्यावरून शाळेत येण्यासाठी गुरुजींनी परवानगी दिली आहे.

घोड्यावर बसून गाठतो शाळा -

मनात शिकण्याची जिद्द असली तरी संकटावर मात करून ज्ञानार्जनाचे धडे गिरवले जातात, याची अनेक उदाहरणे आपण पाहत असतो. वडिलांनी कॉलेजमध्ये जायला कार दिली नाही म्हनून महाविद्यालयाला दांडी मारणारेही अनेक बहादूर असतात. मात्र, शिकण्याची जिद्द असली की कोसबर पायदळ जाऊन शाळा गाठणारे ही अनेक आहे. असच एक उदाहरण अमरावतीच्या मेळघाटमधे समोर आले आहे. रस्ते खराब असल्याने सायकल नेहमी पंचर होते. त्यात दळणवळणाची कुठली व्यवस्था नाही. त्यामुळे धारणी तालुक्यातील बहदाली गावातील एक विद्यार्थी थेट घोड्यावर स्वार होऊन १० किलोमीटर अंतरावरील कमळखार या गावात शाळा गाठतो. अभिषेक मांजरेवार, असे या विद्यार्थ्यांचे नाव असून तो यंदा सातव्या वर्गात आहे.

शिक्षकांनी दिली परवानगी -

अमरावती जिल्ह्यातील मेळघाट अतिदुर्गम भाग शासनाच्या नजरेतून नेहमीच दुर्लक्ष राहत असतो. कोट्यावधी रुपयांच्या रस्त्यांची कामे मेळघाटामध्ये फक्त कागदावरच होतात. त्यामुळे दळणवळणाचे साधन नाही. अनेक विद्यार्थी जंगलातून वाट काढत आपल्या शाळेचा रस्ता पकडतात. अशाच प्रकारे अभिषेक मांजरेवारदेखील पूर्वी सायकलने दहा किलोमीटरवरील आपल्या शाळेत जात होता. परंतु आता पावसामुळे रस्त्याची परिस्थिती अतिशय बिकट झाली आहे. ठिकाणी रस्त्यांवर खड्डे पडले आहेत. त्यामुळे सायकल वारंवार पंचर होत असल्याने अभिषेकला शाळेत जाण्यास अनेक अडचणी येत होत्या. त्यामुळे त्याने व त्याच्या वडिलांनी थेट आपल्या मुख्याध्यापक यांना शाळेत घोड्याने येण्याची परवानगी मागितली शिक्षणाची जिद्द मनी असलेल्या अभिषेकची समस्या लक्षात घेऊन मुख्याध्यापकांनी त्याला लागलीच घोड्याने शाळेत येण्याची परवानगी दिली. त्यामुळे दररोज दहा किलोमीटर प्रवास घोड्यावरून अभिषेक आपल्या शाळेपर्यंत प्रवास करत असतो. मागील दहा दिवसांपासून त्याचा हा दिनक्रम झाला आहे.