अमरावती- संत गाडगेबाबा व राष्ट्रसंत तुकडोजी महाराज यांच्याच फळीतील संत अच्युत महाराज यांचा शनिवारी सातवा पुण्यतिथी महोत्सव होता. तिवसा तालुक्यामधील शेंदूरजना बाजार येथे हा महोत्सव आयोजित करण्यात आला होता. यावेळी अच्युत महाराजांच्या हजारो अनुयायांनी त्यांना साश्रुनयनांनी मौन श्रद्धांजली अर्पण केली.
संत अच्युत महाराजांच्या सातव्या पुण्यतिथी सोहळ्यासाठी शेंदूरजना बाजार येथे सकाळपासून भाविकांनी मोठ्या प्रमाणावर गर्दी केली होती. यावेळी संत अच्युत महाराजांच्या समाधीचे दर्शन घेण्यासाठी भाविकांच्या रांगा लागल्या होत्या. जिल्ह्यातुनच नव्हे संपूर्ण विदर्भातून आलेल्या महाराजांच्या अनुयायांनी संपूर्ण परिसर फुलला होता. महाराजांच्या जीवन चरित्रावर प्रकाश टाकत हरिनाम जप व संगीतमय गीते अर्पण करून सकाळी १० वाजून ५ मिनिटांनी मौन श्रद्धांजली अर्पण करण्यात आली. समाधी स्थळाव्यतिरिक्त गावात ठिकठिकाणी भाविकांनी अच्युत महाराजांचा फोटो ठेवून पुजन केले. सर्व गाव स्वच्छ करून श्रद्धांजली अर्पण केली. यावेळी त्यांचे निकटवर्ती अनुयायी उपस्थित होते.
