अमरावती - बुधवारी दहावी बोर्डाचा निकाल जाहीर झाला. यामध्ये अमरावती जिल्ह्यातील अनेक विद्यार्थ्यांनी इंग्रजी, मराठी, गणित, हिंदी आदी विषयात १०० पैकी १०० गुण मिळवले. मात्र, अमरावतीच्या धामणगाव रेल्वे मधील एका मुस्लिम समाजाच्या विद्यार्थ्याने 'संस्कृत' विषयात १०० पैकी १०० गुण मिळवले आहेत. त्यामुळे सर्वांच्या भुवया उंचावल्या. मुशर्रफ सय्यद अली असे विद्यार्थ्याचे नाव असून, तो धामनगाव रेल्वे येथील सेठ फत्तेलाल लाफचंद सेफला महाविद्यालयात शिक्षण घेतो. शहरातील शिवाजी नगरमध्ये राहणाऱ्या मुशर्रफची परिस्थिती बेताचीच आहे. तसेच त्याने दहावीत ९५ टक्के मिळवल्यामुळे त्याचे परिसरामध्ये कौतुक केले जात आहे.
मुस्लिम विद्यार्थ्याने संस्कृतमध्ये मिळवले चक्क पैकीच्या पैकी गुण अमरावती जिल्ह्यातील धामणगाव रेल्वे शहरातील शिवाजी नगरमध्ये अली कुटूंब राहते. घर छोटेच आहे तरिही घरात एकूण ७ सदस्य राहतात. मुशर्रफला हवा तितका एकांत मिळत नसला तरी मिळणाऱ्या वेळेतून त्यांने संधीचे सोने केले. हल्ली विद्यार्थी इंग्रजी, मराठी, गणित विषयात १०० पैकी १०० गुण मिळवतात. मात्र, मूर्शरफने संस्कृत विषयात १०० गुण मिळवले. आम्ही एक वेळ उपाशी राहू पण आमच्या मुलाच्या शिक्षणाला काहीच कमी पडू देणार नाही असं त्याची आई सांगते.मुशर्रफची परिस्थिती बिकट आहे. कुटुंबाचा गाडा हाकण्यासाठी त्याचे वडील सय्यद अली इलेक्ट्रॉनिकचे कामे करतात. आई घरी दोन चार कोंबड्याचे कुक्कुटपालन करते. अशा परिस्थितीत त्यांनी मुलाला शिकवले. माझी परिस्थिती नसल्याने मी शिकू शकलो नाही पण आता मला माझ्या मुलाला आणखी खूप शिकवून त्याला देशसेवा करायला लावायचा मानस त्याच्या वडिलांचा आहे.
