अमरावती - येथील चांदूर बाजार तालुक्यातील कुऱ्हे गावात कौटुंबीक वादातून विवाहितेचा छळ करून नवऱ्याने व सासऱ्याने रॉकेल टाकून तिला जिवंत पेटवून दिल्याची धक्कादायक घटना घडली होती. काल बुधवारी उपचारादरम्यान या विवाहितेचा अखेर मृत्यू झाला. दरम्यान, या घटनेमुळे आरोपी पती गोलू पानसे व सासरा मुन्ना पानसे यांच्याविरोधात शिरजगाव पोलीस ठाण्यात खुनाचा गुन्हा दाखल करण्यात आला आहे.
जिल्ह्यातील चांदूर बाजार तालुक्यातील कुऱ्हा गावात रोशनी नामक महिलेचा पती गोलू तिला वारंवार तू पसंत नाही, असे म्हणून तिचा नेहमी छळ करत होता. घटनेच्या दिवशी रोशनी स्वयंपाक खोलीत गॅसवर पाणी गरम करत असताना आरोपी पती गोलू पानसे व सासरा मुन्ना पानसे यांनी स्वयंपाक खोलीत जाऊन रोशनीला स्वयंपाक का केला नाही, असे म्हणून तिच्याशी वाद घातला.
नंतर तिचा नवरा गोलूने तिच्या अंगावर रॉकेल ओतले. दरम्यान जीव वाचवण्यासाठी धडपडणाऱ्या रोशनीला सासऱ्याने पकडले. यानंतर तिच्या नवऱ्याने तिला पेटवून दिले. त्याच अवस्थेत तिने जीव वाचवण्यासाठी घराबाहेर धाव घेतली असता गावकऱ्यांनी आग विझवून तिला अमरावतीच्या जिल्हा सामान्य रुग्णालयात भर्ती केले होते.
गेल्या दहा दिवसांपासून तिच्यावर उपचार सुरू होते. मात्र, ती गंभीर भाजली गेल्याने अखेर काल तिची प्राणजोत मालवली. तर आरोपी पती गोलू पानसे व सासरा मुन्ना पानसे यांच्याविरोधात शिरजगाव पोलीस ठाण्यात खुनाचा गुन्हा दाखल करण्यात आला आहे.
