..म्हणून काँगेस आमदार विरेंद्र जगतापांना निष्ठावंत कार्यकर्त्यानेच दिला घरचा आहेर

आमदार जगतापांच्या चांदूर रेल्वे येथील घरासमोर त्यांनी मंगळवारपासून आमरण उपोषणाला सुरुवात केली आहे. धामणगाव रेल्वे तालुक्यातील नायगाव आणि वरुड बगाजी येथील एका महिला रुग्णास वैद्यकीय अधिकाऱ्याने अश्लील शिवीगाळ केली होती. याप्रकरणी तो मुजोर वैद्यकीय अधिकारी चौकशी अहवालानुसार दोषी आढळून सुध्दा कारवाई झाली नाही. त्यामुळे सिसोदे यांनी या घटनेचा निषेध करत हे आंदोलनाचे हत्यार उपसले आहे.

अमरावती - काँग्रेसचे जुने निष्ठावंत कार्यकर्ते तथा धामणगाव रेल्वे पंचायत समितीचे माजी उपसभापती सुनील सिसोदे यांनी आमदार विरेंद्र जगताप यांच्या विरोधातच बंड पुकारले आहे. आमदार जगतापांच्या चांदूर रेल्वे येथील घरासमोर त्यांनी मंगळवारपासून आमरण उपोषणाला सुरुवात केली आहे. धामणगाव रेल्वे तालुक्यातील नायगाव आणि वरुड बगाजी येथील प्रसुती झालेल्या एका महिला रुग्णास वैद्यकीय अधिकाऱ्याने अश्लील शिवीगाळ केली होती. या प्रकरणी तो मगरूर वैद्यकीय अधिकारी चौकशी अहवालानुसार दोषी आढळून सुध्दा कारवाई झाली नाही. त्यामुळे सिसोदे यांनी या घटनेचा निषेध करत हे आंदोलनाचे हत्यार उपसले आहे.

धामणगाव रेल्वे तालुक्यातील नायगाव येथील एक आदिवासी महिला २८ सप्टेंबर २०१७ ला रात्री १२.३० वाजता प्रसूतीकरिता मंगरूळ दस्तगीर येथील प्राथमिक आरोग्य केंद्र येथे गेले होती. तेव्हा प्राथमिक आरोग्य केंद्रातील वैद्यकीय अधिकारी डॉ. डोंगरे यांनी सदर आदिवासी महिलेला अश्लील भाषेत शिवीगाळ केली होती. त्यानंतर ८ ऑक्टोंबर २०१७ ला डॉ. संतोष माने यांना समिती प्रमुख नेमून ७ लोकांची चौकशी समिती गठित करण्यात आली होती. त्या चौकशी समितीमध्ये डॉ. डोंगरे यांनी अश्लील भाषेत शिवीगाळ केल्याचे आणि इतर अनेक गंभीर आरोप सिद्ध झाले. हे सर्व आरोप चौकशी समितीच्या अहवालामध्ये नमूद असल्याचे उपोषणकर्ते सुनील सिसोदे यांनी सांगितले.

या सर्व बाबींच्या अनुषंगाने संबंधित अधिकारी व पदाधिकारी यांच्या भेटी घेतल्या असता, चौकशी समितीच्या अहवालानुसार कारवाई न करता थातूरमातूर कारवाई करून पदाधिकारी आणि अधिकारी यांनी दोषींना सहकार्य केल्याचा आरोप सुनील सिसोदे यांनी केला. त्यामुळे यानंतरही प्राथमिक आरोग्य केंद्र मंगरूळ दस्तगीर येथे असाच प्रकार चालू असल्याचा आरोपही त्यांनी केला आहे. तशा प्रकारच्या तक्रारी सुद्धा दाखल झाल्या आहेत. याशिवाय २०१८ मध्ये ऑगस्ट महिन्यात वरुड बागाजी येथील एका प्रसूतीसाठी गेलेल्या महिलेस सुद्धा शिवीगाळ केल्याचे सिसोदे यांनी सांगितले. सदर वैद्यकीय अधिकाऱ्यावर दोन वर्षापासून कोणतीही कारवाई न झाली नाही. मात्र, या प्रकरणी आमदार विरेंद्र जगताप यांनी आरोग्य मंत्री यांच्याकडे तक्रार केली नाही, किंवा विधानसभेत सुद्धा प्रश्न उचलला नसल्याचा आरोप सिसोदे यांनी केला आहे. त्यामुळेच आता मी आमरण उपोषणाला बसलो असल्याचे सुनील सिसोदे यांनी सांगितले. आपल्याच नेत्याविरोधात कार्यकर्ता उपोषणाला बसल्यामुळे अनेकांनी उपोषणस्थळी गर्दी केल्याचे चित्र यावेळी पाहायला मिळाले.