अमरावती - शादी डॉटकॉमवर मैत्री झालेल्या महिलेची फसवणूक करत तिला 26 लाख रुपयांचा चुना लावल्याची घटना घडली आहे. या प्रकरणी पीडित महिलेच्या तक्रारीवरून गाडगेनगर पोलीस ठाण्यात गुन्हा दाखल करण्यात आला आहे.
ही महिला तिच्या पतीपासून विभक्त झाली आहे. तिला 2 मुले आहेत. पुन्हा आयुष्याचा जोडीदार शोधण्यासाठी तिने शादी डॉटकॉम या संकेतस्थळावर नोंदणी केली. दरम्यान, तिची मुंबईमधील अजयसिंग अग्रवाल या तरुणाशी ओळख झाली. दोघांचे बोलणे सुरु झाले. दोघांच्या मैत्रीला पालवी फुटत असतानाच अजयसिंगने पीडित महिलेला आपण कंत्राटदार आहोत, आपले मुंबईत दोन फ्लॅट असल्याची खोटी माहिती दिली. अजयसिंगने दिलेल्या माहितीवर या महिलेने विश्वास ठेवला. यानंतर आपल्याला या व्यवसायात कंत्राटदाराकडून फसवणूक झाली असे सांगत महिलेकडे पैशाची मागणी केली. अजयसिंगने आधी 15 ते 20 लाख रुपयांची गरज असल्याचे सांगितले. सुरुवातीला त्याने 2 लाख, नंतर 20 लाख यानंतर पुन्हा 1 लाख, पुन्हा 90 हजार आणि शेवटी 2 लाख रुपये घेत एकूण 26 लाख रुपयांचा चुना लावला आहे.
हेही वाचा - ...म्हणून न्यायाधीश बदलावा, अश्विनी बिद्रे-गोरेंच्या पतीचा साक्ष देण्यास नकार
दरम्यान, एक दिवस हे दोघेही व्हिडिओ कॉलवर बोलत असताना पीडित महिलेला एका महिलेचा आवाज आला. ती महिला कोण आहे हे जाणून घेण्यासाठी तिने पुन्हा कॉल केला. यानंतर तिने विचारणा केली असता, ही मित्राची पत्नी आहे, अशी खोटी माहिती अजयसिंगने दिली. यानंतर अजयसिंह अग्रवाल हा आपली फसवणूक करीत असल्याचा संशय पीडित महिलेला आला. तिने मुंबईला जाऊन अजय अग्रवाल याची विचारपूस केली असता त्याने फसवणूक केल्याचे महिलेच्या लक्षात आले. याप्रकरणी पीडित महिलेने आरोपी अजयसिंग याच्याविरोधात गाडगे नगर पोलीस ठाण्यात तक्रार दाखल केली आहे. तर पुढील सुरु आहे.
