अमरावती - जिल्ह्यातील परतवाडा शहरात छोटा बाजार परिसरात सोमवारी (दि. 3 मे) भररस्त्यात रवीनगर परिसरातील रहिवासी असणारा विक्की देविदास पवार (दि. 32 वर्षे) या युवकाचा अज्ञात व्यक्तींनी खून केला. या घटनेने परतवाडा येथे खळबळ उडाली असून शहरात तणाव निर्माण झाला.
पोलीस घटनास्थळी दाखल
घटनेची माहिती मिळताच परतवाडा पोलीस घटनास्थळी दाखल झाले आहेत. पोलिसांनी लागलीच मृतास उपजिल्हा रुग्णालय अचलपूर येथे दाखल केले. मात्र, उपचारापूर्वीच मृत झाल्याचे डॉक्टरांनी सांगितले.
अशी आहे घटना
मृत विक्की देविदास पवार आपल्या मोटरसायकलने छोटा बाजार परिसरातून जात असताना त्या अज्ञात आरोपींसोबत त्याचा वाद झाला. यात आरोपीनी देवीदासच्या मानेवर, डोक्यावर व पोटावर वार झाले आहेत. घटनास्थळीच त्याचा मृत्यू झाल्याची माहिती पोलिसांनी दिली.
परतवाडा येथील 25 पॉईंट्स वर पोलीस तैनात
घटनेचे गांभीर्य ओळखून परतवाडा शहरातील पंचवीसही पॉईंटवर पोलीस तैनात करण्यात आले आहेत. शहरात पोलीस बंदोबस्त वाढविण्यात आला आहे. दंगा नियंत्रण पथकासह शिघ्र कृती दल व राखीव पोलीस दल शहरात दाखल झाले आहे. जिल्ह्यातील लगतच्या पोलीस ठाण्यातून कुमक मागविण्यात आली आहे.
पोलीस घेत आहेत आरोपींचा शोध
पोलिसांनी सध्या आपल्या दप्तरी गुन्ह्याची नोंद केली नसली तरी पोलिसांना या घटनेतील आरोपींची माहिती मिळाली आहे. पोलीस आरोपींचा शोध घेत आहेत.
हेही वाचा - अमरावती-नागपूर राष्ट्रीय महामार्गावर नियंत्रण सुटल्याने ट्रक पलटी; जीवितहानी नाही
