अमरावती - अमरावती शहरातून जाणाऱ्या नांदगाव पेठ देवलगाव रिंग रोडवर तवेरा आणि ट्रकच्या भीषण अपघातात पाच जण ठार झाले आहेत. हा अपघात इतका भीषण होता की कारचा चुराडा झाला असून ट्रकचे दोन्ही चाक बाहेर आले आहेत.
असा झाला अपघात - तवेरा गाडीने अंजनगाव सुर्जी येथील एक कुटुंब लग्नानिमित्त रिंग रोड वरून वलगाव कडून नांदगाव पेठच्या दिशेने जात असताना पोटे कॉलेज पासून काही अंतरावरच तवेरा गाडीने एका दुचाकीच्या पुढे जाण्याचा प्रयत्न केला. दरम्यान समोरून भरधाव वेगात येणारा ट्रक तवेरा गाडीवर आदळला. हा अपघात इतका भीषण होता की तवेरा गाडीवर आदळलेला ट्रक रस्त्याच्या बाजूला असणाऱ्या विजेच्या खांब तोडून रस्त्याच्या कडेला गेला. अपघात झाल्याचे लक्षात येताच लगेच कंपनीत काम करणारे कामगार धावून आले. तवेरा मधील पाच पैकी चारजण घटनास्थळीच ठार झाले होते. तर एका व्यक्तीला नागरिकांनी बाहेर काढून रुग्णालयात दाखल करण्यात आले. मात्र उपचारादरम्यान त्यांची प्राणज्योत मालवली.
राज्यमंत्री बच्चू कडू यांनी केली पाहणी - अपघातानंतर या मार्गावरून जात असलेले राज्यमंत्री बच्चू कडू यांनी अपघातग्रस्त वाहनाची पाहणी करून अपघातासंदर्भात माहिती घेतली. या अपघातानंतर ट्रकचालक पसार झाला असून नांदगाव पेठ पोलीस या घटनेचा तपास करीत आहेत.
