अकोला - नागपूरहून मूर्तिजापूरकडे वृत्तपत्र घेऊन येणाऱ्या वाहनाने उभ्या असलेल्या ट्रॅक्टरला धडक दिली. ही घटना राष्ट्रीय महामार्गावरील कोहिनूर ढाब्याजवळ पहाटे घडली. या अपघातात दोन जण ठार तर तीन जण गंभीर जखमी आहेत. मृतांमध्ये एका तृतीयपंथीचा समावेश आहे.
ट्रॅक्टर (क्रमांक एमएच ३० जे ९६२३) हा रस्त्यावर उभा होता. दरम्यान, वृत्तपत्र घेऊन येणाऱ्या (क्रमांक एमएच ४९ एफ ०५४९) बोलेरो वाहनाने ट्रॅक्टरला धडक दिली. यामध्ये प्रेरणा नामक तृतीयपंथी घटनास्थळी ठार झाली असून ती अकोला येथील रहिवासी आहे. तर तेल्हारा पंचायत समिती मध्ये जिल्हा परिषद शाळेत शिक्षक म्हणून कार्यरत असलेले मोहम्मद सादीक अब्दुल समद यांचा उपचारा दरम्यान मृत्यू झाला आहे.
अपघातात गंभीर जखमी झालेले शिक्षक ऐनुल्ला शेख आणि पोलीस शिपाई यांना पुढील उपचारासाठी अकोला येथे पाठविण्यात आले आहे. इरफाना ही तृतीयपंथी मूर्तिजापूर येथील लक्ष्मीबाई देशमुख उपजिल्हा रुग्णालयात उपचार घेत आहेत. पुढील तपास ठाणेदार दत्तात्रय आव्हाळे यांच्या मार्गदर्शनाखाली शहर पोलीस करत आहेत.
