अकोला - लोकसभा निवडणुकीच्या पार्श्वभूमीवर नाकाबंदी वेळी अकोट तालुक्यातील रुईखेड फाट्याजवळ दोन लाख दहा हजार रुपयांची रक्कम पकडण्यात आली आहे. अकोला जिल्ह्यातील रुईखेडा फाट्याजवळ ही कारवाई करण्यात आली.
एसएसटी पथक व अकोट ग्रामीण पोलिसांच्या संयुक्त विद्ममाने ही कारवाई करण्यात आली. सध्या निवडणुकीचा हंगाम असल्याने महसूल खाते व पोलिसांचे पथक निवडणुकीदरम्यान अवैध मागार्ने निधी येऊ नये, याकरिता नाकाबंदी करून आहेत. या दरम्यान अंजनगाव मार्गे दोन लाख रुपयांची रोख रक्कम येत असल्याची माहिती पोलिसांना मिळाली.
उपलब्ध माहितीवरुन रुईखेड फाट्यावर नाकाबंदी करून एका इसमास तपासणी केली असता त्याच्याकडे दोन लाख दहा हजार रुपये रोख रक्कम सापडली आहे. ही रक्कम पोलिसांकडून ताब्यात घेण्यात आली आहे. तर रक्कम बाळगणारा व्यक्ती हा तेल्हारा येथील व्यापारी असल्याचे माहिती पोलिसांनी दिली आहे. सदरील रक्कम दालमीलची असून मात्र तो ही रक्कम कुठे घेऊन चालला होता यांची कसून चौकशी करण्यात येत आहे ही कारवाई अकोट तहसीलदार अशोक गीते, ग्रामीण पोलीस ठाण्याचे ठाणेदार ज्ञानोबा यांच्या मार्गदर्शनाखाली साहाय्यक पोलीस निरीक्षक शहाजी रुपनर, तलाठी डोंगरे व इतर कर्मचाऱ्यांनी पार पाडली.
