शिर्डीत संचारबंदी दरम्यान चोरट्यांचा किराणा दुकानावर डल्ला.. किराणा सामानासह हँडवॉशची चोरी

शिर्डीत किराणा मालाच्या दुकानात चोरी झाली आहे. चोरांनी किराणा माल, रोख रकमेसह हँड वॉशवरही हात मारला आहे. चोरी करतांना हँड वॉशही नेल्याने कोरोनाच्या संसर्गात चोरटेही स्वच्छतेचीही काळजी घेत असल्याचेही समोर आले आहे.

शिर्डी (अहमदनगर ) - कोरोनाच्या जगव्यापी संकटात आता गावोगावी किराणा मालाच्या चोरीच्या घटनाही समोर येत आहेत. आज (शनिवार) पहाटेच्या सुमारास शिर्डीतील एक दुकान फोडून चोरट्यांनी किराणा मालासह हॅंड वॉशवरही हात मारला.

नगर-मनमाड मार्गालगत जोशी हॉस्पिटलच्या समोर अशोक जगन्नाथ अहिरे यांचे श्रम साफल्य नावाचे किराणा मालाचे होलसेल दुकान आहे. शनिवारी मध्यरात्रीनंतर चोरट्यांनी शटर तोडून या दुकानात चोरी करून जवळपास पाऊण लाखांचा माल लांबवला. यात प्रत्येकी पंधरा किलो वजनाचे सोळा तेल डबे, २० किलो तूप, काजू, बदाम, वेगवेगळ्या प्रकारचे चॉकलेटस, बिस्कीट व जवळपास पंचवीस हॅंड वॉशचाही समावेश आहे. याशिवाय दुकानाच्या गल्ल्यातील दहा ते पंधरा हजाराची रोकडही चोरीस गेली आहे. चोरट्यांनी हा माल नेण्यासाठी मोठ्या गाडीचा वापर केला असण्याची शक्यता आहे....

सध्या कोरोनाच्या पार्श्वभूमीवर देशभर अनिश्चीत काळासाठी संचारबंदी असल्याने नागरिक तुटवड्याच्या भीतीने किराणा माल, धान्य आदींचा साठा करून ठेवत आहेत. त्यातच अनेक गुन्हेगारांच्या हातांनाही सध्या काही काम नसल्याने लहान-मोठ्या चोऱ्या होण्याची शक्यता आहे. पण चोरी करतांना हँडवॉशही नेल्याने कोरोनाच्या संसर्गात चोरटेही स्वच्छतेचीही काळजी घेत असल्याचेही समोर आले आहे. पोलिसांनी घटनास्थळी भेट देवून पंचनामा केला असून पुढील तपास सुरू आहे. पोलिसांनी रात्रीची गस्त वाढविण्याची मागणी माजी नगराध्यक्षा जयश्री थोरात व विष्णू थोरात यांनी केली आहे.