शिर्डी (अहमदनगर) - साईबाबा संस्थानकडून दरवर्षीप्रमाणे यावर्षीही गुरूपौर्णिमा उत्सव साजरा केला जाणार आहे. ०४ जुलै ते ६ जुलै या काळात गुरूपौर्णिमा उत्सव येत असून कोरोना विषाणूच्या प्रादुर्भावाचा विचार करून यंदा उत्सव साध्या पध्‍दतीने साजरा करण्यात येणार आहे. यानिमित्‍ताने उत्सवाच्या मुख्‍य दिवशी श्री साईआश्रम येथे भव्‍य रक्‍तदान शिबीराचे आयोजन करण्यात आले असल्‍याची माहिती संस्थानचे मुख्‍य कार्यकारी अधिकारी अरुण डोंगरे यांनी दिली आहे.
जगभर आलेल्‍या कोरोना विषाणूच्या संकटामुळे प्रतिबंधात्‍मक उपायांकरता सरकारकडून लॉकडाऊन करण्यात आले. दिनांक १७ मार्च पासून श्री साईबाबांचे समाधी मंदिर साईभक्‍तांना दर्शनासाठी बंद ठेवण्‍यात आलेले आहे. अनलॉक प्रक्रिया हळूहळू होत असल्यामुळे शिर्डी येथे श्री गुरूपौर्णिमा उत्सव साध्या पध्‍दतीने साजरा करण्यात येणार आहे. याकालावधीत कुठलेही सांस्‍कृतिक कार्यक्रम होणार नसून, श्रींचा रथ व पालखी मिरवणूक कार्यक्रम रद्द करण्यात आलेला आहे.
गुरूपौर्णिमा उत्सवाच्या प्रथम दिवशी शनिवारी (४ जुलै) पहाटे साडेचार वाजता श्रींची काकड आरती, ५ वाजता श्रींच्या फोटोची आणि पोथीची मिरवणूक, ५.१५ मिनिटांनी द्वारकामाई श्री साईसच्चरिताचे अखंड पारायण, ५.३० वाजता श्रींचे मंगलस्नान, सकाळी ६.०० वाजता श्रींची पाद्यपुजा, दुपारी १२.३० वाजता श्रींची माध्यान्ह आरती आणि सायंकाळी ०४.०० ते ०६.०० या वेळेत कीर्तनाचा कार्यक्रम होणार आहे. सायं. ०७.०० वाजता श्रींची धुपारती होईल. रात्रौ १०.३० वाजता श्रींची शेजारती होईल. या दिवशी पारायणासाठी द्वारकामाई रात्रभर उघडी राहील.
उत्सवाच्या मुख्‍य दिवशी रविवारी (५ जुलै) सकाळी ०४.३० वाजता श्रींची काकड आरती, ०५.०० वाजता अखंड पारायण समाप्ती व श्रींच्या फोटोची व पोथीची मिरवणूक, ०५.२५ वाजता श्रींचे मंगलस्नान, सकाळी ०६.०० वाजता श्रींची पाद्यपुजा, दुपारी १२.३० वाजता श्रींची माध्यान्ह आरती व सायंकाळी ०४.०० ते ०६.०० या वेळेत कीर्तन कार्यक्रम होणार असून सायंकाळी ०७.०० वाजता श्रींची धुपारती होईल. रात्रौ १०.३० वाजता श्रींची शेजारती होईल.
उत्सवाच्या सांगता दिनी सोमवारी (६ जुलै) पहाटे ०४.३० वाजता श्रींची काकड आरती होईल. सकाळी ०५.४५ वाजता श्रींचे मंगलस्नान, सकाळी ०७.०० वाजता श्रींची पाद्यपुजा व गुरुस्थान मंदिरात रुद्राभिषेक होणार असून सकाळी १०.०० वाजता गोपालकाला कीर्तन व दहिहंडीचा कार्यक्रम होणार आहे. दुपारी १२.१० वाजता श्रींची माध्यान्ह आरती होणार असून सायंकाळी ०७.०० वाजता श्रींची धुपारती होईल. रात्रौ १०.३० वाजता श्रींची शेजारती होईल...
कोरोनाच्‍या प्रादुर्भावामुळे मोठयाप्रमाणात रक्‍ताची उणीव भासत आहे. याकरीता श्री गुरूपौर्णिमा उत्‍सवानिमित्‍ताने उत्सवाच्या मुख्‍य दिवशी ५ जुलै रोजी सकाळी ०९.०० ते सायंकाळी ०५.०० वाजेपर्यंत श्री साईआश्रम (१ हजार रुम) येथे भव्‍य रक्‍तदान शिबीराचे आयोजन करण्यात आलेले आहे. तसेच ज्‍या रक्‍तदात्‍यांना प्‍लाझ्मा या रक्‍त घटकाचे दान करावयाचे आहे, अशा दात्‍यांनी आपली नावे श्री साईनाथ रक्‍तपेढी, शिर्डी येथे नोंदवावी, असे आवाहन संस्थानच्या वतीने करण्यात आले आहे.
