अहमदनगर - गृहरक्षक दलाच्या जवानांना मागील सहा महिन्यांपासून पगार मिळाला नसल्यामुळे त्यांच्यावर उपासमारीची वेळ आली आहे. तसेच कामावर आले नाहीतर नोटीस दिल्या जातात, असा आरोप गृहरक्षक दलाच्या संघटनेने केला आहे. या पार्श्वभूमीवर २४ फेब्रुवारीला आझाद मैदानावर राज्यभरातील गृहरक्षक दलाचे जवान आंदोलन करणार असल्याची माहिती भारत चव्हाण यांनी दिली आहे.
गृहरक्षक दलाच्या जवानांना सणाच्या दिवशी कामावर घेतले जाते. यामुळे त्यांना उपजीविकेसाठी अर्धवेळ इतर ठिकाणी कामावर जावे लागते. जर कामावर गेले नाही तर काढून टाकण्याची धमकी दिली जाते. तसेच मिळणारे वेतन तुटपुंजे आहे. पोलिसांच्या खांद्याला खांदा लावून काम करणाऱ्या या जवानांना कामाचा मोबदला मात्र, सहा-सहा महिने मिळत नाही. म्हणून याप्रश्नी शासनाने लक्ष देऊन त्वरित वेतन अदा करण्यात यावे, अशी मागणी आता जोर धरू लागली आहे. नाहीतर उपोषण, आंदोलन आणि प्रसंगी आत्मदहन करू, असा इशारा संघटनेच्यावतीने देण्यात आला आहे.
हेही वाचा - 'मराठवाडा वॉटर ग्रीड योजनेबाबत तपासणी करावी लागणार'
सर्वोच्च न्यायालयाने गृहरक्षक दलाला राज्य सरकारने कायमस्वरूपी ३६५ दिवस काम द्यावे किंवा महिना साडेतीन हजार रुपये द्यावे, असा आदेश १० डिसेंबर २०१९ रोजी सरकारला दिला आहे. मात्र, शासनाने यासाठी सहा महिन्यांची मुदत मागितली आहे. त्यामुळे हा प्रश्न प्रलंबित आहे. गृहरक्षक दलाच्या जवानांना कायमस्वरूपी वेतन आणि काम मिळाल्यास त्यांच्या कुटुंबीयांचा प्रश्न सुटू शकतो.
