अहमदनगर - श्रीरामपूर तालुक्यात झालेल्या अतिवृष्टी, गारपीट यामुळे शेतकऱ्यांची परिस्थिती बिकट झाली आहे. या शेतकऱ्यांना सावरण्यासाठी महाराष्ट्र सरकारने निवडणुकांपूर्वी जाहीर केलेल्या वचननाम्याप्रमाणे शेतकऱ्यांचा सात बारा उतारा कोरा करावा. अन्यथा दिवाळीच्या दिवशी हजारो शेतकरी महसूलमंत्री बाळासाहेब थोरात यांचा घरासमोर चटनी-भाकरी खाऊन दिवाळी साजरी करणार असल्याचे निवेदन शेतकऱ्यांनी श्रीरामपूर तहसीलदार प्रशांत पाटील यांना दिले आहे.
राज्यातील शेतकऱ्यांचे गेल्या 10 वर्षांपासून सातत्याने अवकाळी पाऊस, गारपीट, दुष्काळ, अतिवृष्टी यामुळे प्रचंड नुकसान होत आहे. अशा परिस्थितीत कोरोना विषाणुमुळे पिकलेला शेतमालही कवडीमोल भावाने विकण्याची वेळ आली आहे. राज्य शासनाच्या व केंद्र शासनाच्या शेतकरीविरोधी कायद्यामुळे शेतमालाला उत्पादन खर्चाइतकाही दर न मिळाल्याने तोट्यात विकण्याची वेळ शेतकऱ्यांवर येत आहे. फडणवीस सरकारने अटी व शर्ती लादून केलेल्या छत्रपती शिवाजी महाराज शेतकरी सन्मान योजनेचा लाभ शेतकर्‍यांना झालेला नाही. त्यामुळे गेल्या 10 वर्षापासून शेतकरी राष्ट्रीयकृत, व्यापारी, सहकारी, पतसंस्था, आदी बँकेचे कर्ज थकले आहे. त्यामुळे त्यांना नवीन पिक कर्ज मिळणे कठीण झाले आहे. याचा परिणाम म्हणजे शेतकरी आत्महत्यांच्या घटनांमध्ये दिवसेंदिवस वाढ होत आहे.
हेही वाचा -कोकण विभाग अतिवृष्टी, पीकविमा व पर्यटन विकासासंदर्भात आढावा बैठक
बँकांकडून शेतकऱ्यांना धमकी -
बँकांकडून शेतकर्‍यांना जप्तीच्या नोटीसा अथवा जप्तीची धमकी दिली जात आहे. व्यापारी बँकाकडून शेती कर्ज वाटताना संबंधीत कर्ज खातेदारांकडून कोरे चेक घेतले आहेत. परंतु सदर कर्जाचे हप्ते थकल्याने बँकाकडून चेक बँकेमध्ये टाकले जातात. खात्यावर पैसे शिल्लक नसल्याने चेक वटत नाही. त्यामुळे बँका भारतीय दंड विधान कलम 420 अन्वये शेतकर्‍यांवर फसवणुकीचे गुन्हे दाखल करीत आहे. याबाबींमुळे शेतकर्‍यांचे मानसिक संतुलन बिघडले आहे. तरी सदर शेतकर्‍यांचे 420 अन्वये गुन्हे दाखल न करण्याचे आदेश पोलिसांना द्यावे. तसेच जिल्हा बँकेने चालू वर्षाकरिता राष्ट्रीयकृत बँक थकबाकी शेतकर्‍यांचे पिक कर्ज देण्याचा एक चांगला निर्णय घेतला. परंतु राष्ट्रीयीकृत बँकाकडून सेवा सोसायटीसाठी थकबाकीचे दाखले न दिल्याने सदर कर्जापासूनही वंचित राहण्याची वेळ शेतकर्‍यांवर आलेली असल्याचे शेतकरी संघटनेचे श्रीरामपूर तालुकाध्यक्ष अनिल औताडे यांनी सांगितले.
हेही वाचा - जालन्यात आवक वाढल्याने आल्याचे दर गडाडले, शेतकऱ्यांचे नुकसान
