नवी दिल्ली - भारतीय क्रीडा प्राधिकरणाने (SAI) सर्व संस्थांना वर्षातून दोनदा त्यांच्या प्रशिक्षकांची तंदुरुस्ती चाचणी घेण्यास सांगितले आहे. शिवाय, या चाचण्यांची नोंदही ठेवण्यास सांगितले गेले आहे. फिटनेस टेस्ट प्रोटोकॉलनुसार, सर्व प्रशिक्षकांना विविध चाचण्यामंधून जावे लागणार आहे.
पंतप्रधान नरेंद्र मोदी यांनी २४ सप्टेंबर रोजी सुरू केलेल्या फिटनेस प्रोटोकॉलन्वये, वयानुसार आणि योग्यतेनुसार ही चाचणी घेण्यात येईल. क्रीडा प्राधिकरण हे प्रामुख्याने तज्ञ प्रशिक्षकांच्या मदतीने खेळाडूंना अधिक चांगले प्रशिक्षण देण्यासाठी ओळखले जाते. प्रशिक्षकांचा फिटनेस त्यांना मैदानावर प्रशिक्षण देण्यासाठी अत्यंत आवश्यक आहे, असे प्राधिकरणाने एका निवेदनात म्हटले आहे.
"प्रशिक्षकांना तंदुरुस्तीची आवश्यक असते जेणेकरून ते खेळाडूंना योग्य मार्ग दाखवू शकतील. म्हणून, प्रोटोकॉलनुसार प्रशिक्षकांना वर्षातून दोनदा फिटनेस टेस्ट द्याव्या लागतील", असेही प्राधिकरणाने सांगितले.
भारतीय क्रीडा प्राधिकरण (sports authority of india) हा भारतीय क्रीडा मंत्रालयाचा एक महत्त्वाचा भाग आहे. क्रीडा प्रोत्साहन योजनांच्या माध्यमातून भारतीय क्रीडा प्राधिकरण युवकांमध्ये प्रतिभा निर्माण करण्याचे काम करते. यासाठी ते त्यांना आवश्यक पायाभूत सुविधा, उपकरणे, प्रशिक्षण सुविधा आणि स्पर्धेच्या संधी उपलब्ध करून देते. भारतीय क्रीडा प्राधिकरण ही भारतातील सर्वोच्च राष्ट्रीय क्रीडा संस्था आहे.
