पुणे - 63 व्या महाराष्ट्र केसरी स्पर्धेसाठी पुण्यातील बालेवाडीमधील शिवछत्रपती क्रीडा संकुल सज्ज झाले आहेत. मातीवरील कुस्तीसाठी २ आणि मॅटवरील कुस्तीसाठी २ आखाडे स्पर्धेच्या ठिकाणी तयार करण्यात आले आहेत.
मावळ आणि मूळशी भागातील डोंगरांवरून चांगल्या प्रतीची ४० ब्रास माती आणून २०-२० ब्रासचे दोन आखाडे तयार करण्यात आले आहेत. या मातीत एक हजार लिंबू, २५० किलो हळद, ५० किलो कापूर, रोज शंभर लीटर ताक आणि ६० लीटर तेल घालून आखाडे तयार केले आहेत.
कुस्तीगीरांना स्पर्शातून किंवा जखमांतून कोणत्याही प्रकारच्या आजारांची लागण होऊ नये, म्हणून ही खबरदारी घेण्यात आली आहे. ४० बाय ४० चे रिंगण आणि ३० बाय ३० चा प्रत्यक्ष खेळाचा भाग अशाप्रकारे हे चारही आखाडे आहेत. आखाड्यांचा मुख्य मंच ६० बाय २१० फुटांचा असून त्या बाहेर १० फुटाचा भाग पंचांसाठी आणि पहिलवानांच्या तयारीसाठी ठेवण्यात आला आहे.
हेही वाचा - विराटने श्रीलंकेविरुद्धच्या मालिकेआधी बदलला लुक, पाहा फोटो
ही स्पर्धा दहा वजनी गटात होणार आहे. गुरुवारी सकाळपासून राज्यातील ४४ जिल्ह्यांमधून पहिलवानांचे आगमन सुरू झाले. ९०० ते ९५० पहिलवान आणि १२५ पंच या स्पर्धेसाठी बालेवाडी येथे दाखल झाले आहेत.
३ जानेवारी २०२०चे वेळापत्रक -
सकाळी ९ ते दुपारी १२ वाजेपर्यंत कुस्ती स्पर्धा ‘अ’ विभाग (५७ व ७९ किलो वजनी गट)
दुपारी १२ ते १ वैद्यकीय तपासणी ‘ब’ विभाग (६१,७० व८६ किलो)
दुपारी ४ ते सायंकाळी ६ वाजेदरम्यान उपांत्य आणि अंतिम फेरीच्या लढती ‘अ’ व ‘ब’ विभाग (५७, ६१,७०, ७९ आणि ८६ किलो वजनी गट)
