अहमदाबाद - विकास खंडोलाने कमवलेल्या दमदार १२ गुणांच्या जोरावर हरियाणा स्टीलर्सने बंगळुरु बुल्सवर मात केली आहे. बंगळुरु बुल्सचा संघ सध्या गुणतालिकेत दुसऱ्या स्थानावर विराजमान आहे. तर, हरियाणाचा संघ गुणतालिकेत नवव्या स्थानी आहे.
प्रो कबड्डीच्या सातव्या हंगामात रंगलेल्या या सामन्यात हरियाणाने ३३-३० असा विजय मिळवला. हरियाणाने यंदाच्या स्पर्धेत सलग दुसरा विजय मिळवला आहे. विकासने या लीगमध्ये आपल्या चढाईच्या २०० गुणांचे खाते पूर्ण केले. पहिल्या सत्रात बंगळुरुचा संघ १७-१६ अशा फरकाने पुढे होता.
दुसऱ्या सत्राचा खेळ सुरु झाला तेव्हा, बचावपटू विकास काळेने हरियाणासाठी उत्तम कामगिरी केली. रंजक चालू असलेल्या या सामन्यात विकासमुळे पहिल्यांदा हरियाणाने आघाडी घेतली. त्यानंतर उत्तम चढाया आणि बचावाच्या जोरावर हरियाणाने अखेर सरशी साधली.
बंगळुरु बुल्सच्या रोहित कुमारने या लीगमध्ये चढाईचे ६०० गुण पूर्ण केले. त्याने या सामन्यात १२, पवन कुमार सहरावतने सात तर, हरियाणाच्या विकास काळेने ६ गुण कमावले आहेत.
