नवी दिल्ली : आयपीएल 2023 चा चौथा सामना राजस्थान रॉयल्स आणि सनरायझर्स हैदराबाद यांच्यात आज दुपारी 3.30 वाजता खेळवला जाईल. राजस्थान रॉयल्स 2008 मध्ये झालेल्या पहिल्या आयपीएलचा चॅम्पियन आहे. तेव्हा शेन वॉर्न राजस्थानचा कर्णधार होता. राजस्थानने गेल्या मोसमात अंतिम फेरी गाठली होती. मात्र अंतिम सामन्यात त्यांना गुजरात टायटन्सकडून पराभव पत्कारावा लागला होता. दुसरीकडे सनरायझर्स हैदराबाद एक वेळचा चॅम्पियन आहे. त्यांनी 2016 मध्ये डेव्हिड वॉर्नरच्या नेतृत्वाखाली ही स्पर्धा जिंकली होती.
हेड टू हेड : सनरायझर्स हैदराबाद आणि राजस्थान रॉयल्स यांच्यात झालेल्या गेल्या पाच सामन्यांमध्ये रॉयल्सचे वर्चस्व राहिले आहे. रॉयल्सने तीन सामने जिंकले आहेत तर हैदराबादला दोन सामने जिंकता आले आहेत. भारताचा वेगवान गोलंदाज भुवनेश्वर कुमार सनरायझर्सचा कर्णधार आहे. धडाकेबाज सलामीवीर मयंक अग्रवाल देखील या संघात आहे, जो मागील हंगामात पंजाब किंग्जचा कर्णधार होता. तसेच राहुल त्रिपाठी आणि हॅरी ब्रूकसारखे फलंदाज हैदराबादला स्वबळावर सामने जिंकून देऊ शकतात.
राजस्थानचा संघ संतुलित : दुसरीकडे, राजस्थानच्या संघात जोस बटलर, यशस्वी जैस्वाल, संजू सॅमसनसारखे चांगले फलंदाज आहेत, जे कोणत्याही क्षणी सामन्याला कलाटणी देऊ शकतात. रॉयल्सची गोलंदाजीची बाजूही भक्कम आहे. त्यांच्याकडे रविचंद्रन अश्विन, जेसन होल्डर, ट्रेंट बोल्ट आणि युझवेंद्र चहलसारखे दर्जेदार गोलंदाज आहेत. दोन्ही संघ एकमेकांना तुल्यबळ असल्याने चाहत्यांना एक रोमांचक सामना पाहायला मिळणार आहे.
दोन्ही संघांची संभाव्य प्लेइंग 11 : राजस्थान रॉयल्स - जोस बटलर (यष्टीरक्षक), यशस्वी जैस्वाल, देवदत्त पडिक्कल, संजू सॅमसन (कर्णधार), शिमरोन हेटमायर, रियान पराग, आकाश वशिष्ठ, रविचंद्रन अश्विन, जेसन होल्डर, युजवेंद्र चहल, ट्रेंट बोल्ट ; सनरायझर्स हैदराबाद - अभिषेक शर्मा, मयंक अग्रवाल, राहुल त्रिपाठी, हॅरी ब्रूक, ग्लेन फिलिप्स (यष्टीरक्षक), अब्दुल समद, वॉशिंग्टन सुंदर, अकील हुसैन, भुवनेश्वर कुमार (कर्णधार), उमरान मलिक, टी. नटराजन
हेही वाचा : KKR vs PBKS : आयपीएलमध्ये कर्णधार म्हणून धवनच्या नावे एकही अर्धशतक नाही! कालही ठरला अपयशी
