चेन्नई - सलामीवीर नितीश राणा (80) आणि राहुल त्रिपाठी (53) अर्धशतकांच्या जोरावर कोलकाता नाइट रायडर्सने सनरायजर्स हैदराबादचा 10 धावांनी पराभव केला. प्रथम फलंदाजी करताना कोलकाता नाईट रायडर्सने २० षटकांत ६ बाद १८७ धावा करत हैदराबादसमोर विजयासाठी १८८ धावांचे आव्हान ठेवले.
कोलकाताच्या आव्हानाचा पाठलाग करताना हैदराबादकडून डेव्हिड वॉर्नर व वृद्धिमान साहा यांनी डावाची सुरूवात केली. हरभजनसिंगच्या अंतिम चेंडूवर साहाने षटकार ठोकून पहिल्या षटकात ८ धावा वसूल केल्या. मात्र, त्यानंतर हैदराबादच्या डावाला गळती लागली. दुसऱ्या षटकात सलामीवीर डेव्हि़ड वॉर्नर यष्टीमागे झेल देऊन माघारी परतला. प्रसिध कृष्णाने वॉर्नरची विकेट घेतली. वॉर्नरनंतर वृद्धिमान साहादेखील अधिक काळ खेळपट्टीवर तग धरू शकला नाही. शाकिब अल हसनने साहाची दांडी गुल केली. त्यानंतर जॉनी बेअरस्टो आणि मनीष पांडे यांनी हैदराबादचा डाव सावरला. 8व्या षटकात हैदराबादने आपले अर्धशतक साकारले. बेअरस्टो आणि पांडे यांनी उपयुक्त भागीदारी करत संघाला अडचणीतून बाहेर काढले. 12व्या षटकात बेअरस्टोने आपले अर्धशतक पूर्ण केले. अर्धशतकानंतर बेअरस्टो कमिन्सच्या गोलंदाजीवर झेल देऊन बाद झाला. त्याने 5 चौकार आणि 3 षटकारांसह 55 धावांची खेळी केली.
त्यापूर्वी केकेआरकडून शुबमन गिल आणि नितीश राणा यांनी सलामी दिली. नितीश राणाने भुवनेश्वर कुमारच्या पहिल्याच चेंडूवर चौकार ठोकत आपले इरादे स्पष्ट केले. संदीपच्या चौथ्या षटकात राणा-गिलने १४ धावा वसूल केल्या. केकेआरने ४ षटकानंतर बिनबाद ३३ धावा केल्या, नितीश राणाने संदीप शर्माच्या गोलंदाजीची पिसे काढत सलग तीन चौकार लगावले. भुवनेश्वर, संदीप शर्मा आणि टी. नटराजन या हैदराबादच्या गोलंदाजांचा खरपूस समाचार घेत या दोघांनी पहिल्या पाच षटकात 45 धावांची दमदार सलामी दिली.
त्यानंतर या दोघांनी सहाव्या षटकात संघाचे अर्धशतक फलकावर लावले. दोघांच्या फटकेबाजीमुळे वॉर्नरने राशिद खानच्या हाती चेंडू सोपवला. राशिदनेही कर्णधाराचा विश्वास सार्थ ठरवत पहिल्याच षटकात शुबमन गिलला वैयक्तिक 15 धावांवर बाद केले. शुबमन बाद झाल्यानंतरही राणाने आपली चौफेर फटकेबाजी सुरूच ठेवत 37 चेंडूत अर्धशतक झळकावले. नितीश राणानंतर मैदानात आलेल्या राहुल त्रिपाटीने २९ चेंडूत ५३ धावांचे योगदान दिले. त्याने दोन षटकार व पाच खणखणीत चौकार ठोकले. टी. नटराजनने यष्टीरक्षक वृद्धिमान साहाकरवी झेलबाद केले.
त्रिपाठी बाद झाल्यानंतर मैदानात आलेल्या आंद्रे रसेलने केकेआर समर्थकांची निराशा केली. राशिद खानने त्याला केवळ पाच धावांवर तंबूत धाडले. त्यानंतर नितीश राणाही पाठोपाठ बाद झाला. नितीश राणाने ५६ चेंडूत ८० धावा केल्या. राणा नंतर कर्णधार ईयॉन मॉर्गन २ धावा तर शाकिब उल हसन ३ धावा काढून माघारी परतले. चांगल्या सुरुवातीनंतर केकेआरच्या विकेट्स ठराविक अंतराने पडत राहिल्याने त्यांना दोनशेचा आकडा गाठता आला नाही. दिनेश कार्तिकने केवळ ९ चेंडूत तडाखेबंद २२ धावा काढल्याने केकेआरला १८७ धावसंख्येपर्यंत मजल मारता आली.
हैदराबादकडून राशिद खान व मोहम्मद नबी यांनी प्रत्येकी दोन तर टी नटराजन व भुवनेश्वर कुमार यांनी प्रत्येकी १-१ बळी मिळवले. केकेआरकडून नितीश राणाने सर्वाधिक ८० धावांचे योगदान दिले.
