कराची - भारत आणि पाकिस्तान यांच्यातील क्रिकेट सामने नेहमीच 'फुल्ल अॅक्शन पॅक्ड' होत असतात. या सामन्याच्या वेळी वातावरणही काही वेगळेच असते. दोन्ही देशातील क्रिकेट चाहत्यांचा उत्साह यावेळी पाहण्यालायक असतो. परंतु मागील अनेक वर्षांपासून उभय संघात सामने झालेली नाहीत. पण आता उभय संघात टी-२० मालिका खेळवण्यात येण्याची शक्यता आहे. पाकिस्तानचे उर्दू वर्तमानपत्र 'डेली जंग'ने या संदर्भातील वृत्त दिले आहे.
डेली जंगने दिलेल्या वृत्तानुसार, भारत आणि पाकिस्तान यांच्यात या वर्षी टी-२० सामन्याची मालिका खेळवण्यात येऊ शकते. डेली जंगने सूत्रांच्या आधारावर या संदर्भातील वृत्त दिले आहे.
पाकिस्तान क्रिकेट बोर्डातील एका वरिष्ठ अधिकाऱ्याने या संदर्भात पहिल्यांदा बोलण्यास नकार दिला. परंतु त्याने नंतर उभय संघातील मालिकेची तयारी करण्यास सांगितले असल्याची कबुली दिली.
सूत्रांच्या महितीनुसार, भारत-पाकिस्तान संघात तीन सामन्याची टी-२० मालिका होणार आहे. या मालिकेसाठी ६ दिवसांचा विंडो पहिला जात आहे.
भारत आणि पाकिस्तान यांच्यात जर ही मालिका झाली तर यानंतर भारतीय संघ पाकिस्तान दौऱ्यावर येईल. कारण २०१२-१३ मध्ये पाकिस्तानने भारत दौरा केला होता, असे देखील डेली जंगने त्यांच्या वृत्तात म्हटलं आहे.
पाकिस्तान बोर्डाचे चेअरमन एहमान मनी यांनी, या मालिकेबाबत कोणताही दुजोरा दिलेला नाही. त्यांनी सांगितलं की, अद्याप कोणीही आम्हाला संपर्क साधलेला नाही. तसेच आम्ही देखील या संदर्भात कोणाशीही चर्चा केलेली नाही.
दरम्यान, भारत आणि पाकिस्तान यांच्यात २०१२-१३ नंतर कोणतीही मालिका झालेली नाही. पण दोन्ही संघ आयसीसीच्या स्पर्धेत खेळत आहेत.
हेही वाचा - केरॉन पोलार्डच्या वडिलांचे निधन, सचिनने वाहिली श्रद्धांजली
हेही वाचा - IPL २०२१ : दिल्ली कॅपिटल्सला झटका, श्रेयस अय्यर आयपीएलला मुकण्याची शक्यता
