मुंबई - समीक्षकांनी गौरविलेल्या व अनेक पुरस्कार मिळविल्या ‘लपाछपी’ या चित्रपटातील हटके भूमिकेत ज्येष्ठ अभिनेत्री उषा नाईक यांनी प्रेक्षकांना धसकावत मनोरंजन केले होते. आता त्या छोट्या पडद्यावर 'फुलाला सुगंध मातीचा’ या मालिकेतून एन्ट्री घेणार आहेत. त्या या मालिकेत कडक काकीसाहेबांची भूमिका साकारणार आहेत.
स्टार प्रवाहवरील ‘फुलाला सुगंध मातीचा’ मालिकेत कीर्तीला स्वत:ला सिद्ध करण्यासाठी जीजी अक्कांनी १५ दिवसांची मुदत दिली होती. पंधरा दिवसांचा हा अवधी आता संपत आला आहे. या पंधरा दिवसात कीर्ती स्वत:ला सिद्ध करू शकली नाही तर, तिला घर सोडून जावे लागणार आहे. कीर्तीच्या खरेपणाची परीक्षा घेण्यासाठी आता मालिकेत काकीसाहेबांची एन्ट्री होणार आहे.
ज्येष्ठ अभिनेत्री उषा नाईक काकीसाहेबांची भूमिका साकारणार आहेत. जीजी अक्कांप्रमाणेच काकीसाहेबांचाही घरात धाक आहे. कुणीही त्यांच्या शब्दाबाहेर जात नाही. त्यामुळे कीर्तीची बाजू त्या समजून घेतील की कीर्तीला आणखी कठोर परीक्षा द्यावी लागणार हे पाहणे उत्सुकतेचे असणार आहे. कीर्तीच्या या कसोटीच्या काळात शुभम तिला कशी साथ देणार याचीदेखील उत्सुकता प्रेक्षकांना आहे.
हेही वाचा - इंग्लंडला कमी लेखण्याची चूक करू नका, भारतीय माजी क्रिकेटपटूची टीम इंडियाला ताकीद
मालिकेतल्या या नव्या वळणाविषयी सांगताना कीर्तीची भूमिका साकारणारी समृद्धी केळकर म्हणाली, ‘कीर्ती पहिल्यांदाच काकीसाहेबांना भेटणार आहे. त्यामुळे ती अतिशय उत्सुक आहे. काकीसाहेबांचा स्वभाव माहित नसल्यामुळे पुढे काय वाढून ठेवले आहे याची कीर्तीला कल्पना नाही. त्यामुळे काकीसाहेबांचे मन जिंकण्याची एकही संधी ती सोडणार नाहीय. काकीसाहेबांच्या परीक्षेत कीर्ती पास होणार का हे पाहणे उत्सुकतेचे असणार आहे.’
मालिका ‘फुलाला सुगंध मातीचा’ सोमवार ते शनिवार रात्री ८.३० वाजता स्टार प्रवाहवर प्रसारित होते.
