मुंबई - हृतिक रोशनच्या 'सुपर-३०' चित्रपटाचा ट्रेलर अखेर प्रेक्षकांच्या भेटीला आला आहे. बऱ्याच दिवसांपासून या चित्रपटाची चाहत्यांना आतूरता होती. हृतिकची आगळी वेगळी भूमिका पाहण्यासाठी चाहते उत्सुक होते. या चित्रपटाचे मोशन पोस्टरही अलिकडेच प्रदर्शित करण्यात आले होते. आता या चित्रपटाचा ट्रेलर प्रदर्शित करण्यात आला आहे.
'अब राजा का बेटा राजा नही बनेगा, राजा वही बनेगा जो हकदार होगा', असा दमदार संवाद या ट्रेलरमध्ये पाहायला मिळतो. भारतातील शिक्षण व्यवस्था आणि एखाद्या व्यक्तीच्या हुशारीच्या जोरावर आपलीच पोळी भाजणारे राजकारणी 'सुपर ३०' च्या ट्रेलरमध्ये पाहायला मिळतात. हा चित्रपट सत्य कथेवर आधारित आहे. गणिततज्ञ आनंद कुमार यांच्या जीवनावर आधारित ही कथा आहे. या चित्रपटाच्या ट्रेलरमध्ये हृतिकची दमदार झलक पाहायला मिळते.
'काबिल' चित्रपटानंतर हृतिक रोशनला पुन्हा पडद्यावर पाहण्यासाठी चाहते प्रतिक्षा करत होते. आता पुन्हा एकदा प्रेक्षकांची मने जिंकण्यासाठी ह्रतिक 'सुपर ३०' चित्रपटातून प्रेक्षकांच्या भेटीला येत आहे. येत्या १२ जुलैला चित्रपट प्रदर्शित होणार आहे. या चित्रपटात हृतिकसोबत मृणाल ठाकूर, नंदिश सिंग, अमित सध आणि पंकज त्रिपाठी हे कलाकारदेखील झळकणार आहेत.
