सध्या मराठी टेलिव्हिजन वाहिन्यांवर नवनवीन मालिका येताहेत आणि त्यात भर पडलीय स्टार प्रवाहवर २२ फेब्रुवारीपासून सुरु होणाऱ्या ‘स्वाभिमान’ या मालिकेची. या मालिकेतून अभिनेत्री आसावरी जोशी प्रेक्षकांच्या भेटीला येणार आहेत. अदिती सूर्यवंशी असं त्यांच्या व्यक्तिरेखेचं नाव असून त्या प्रोफेसरच्या भूमिकेत दिसणार आहेत. अदिती सूर्यवंशी दापोलीच्या एका कॉलेजमधील प्रोफेसर आहे. जी अत्यंत बुद्धिमान आणि विचारी आहे. ती काळाच्या पुढचा विचार करणारी आहे. स्वाभिमान मालिकेच्या कथेतील नायिका म्हणजेच पल्लवीची ती आदर्श आहे. पल्लवीसाठी अदिती मॅडम हेच तिचं विश्व आहे. पल्लवीमध्ये असणारी चमक अदितीला उमगते आणि ती खूप पुढे जावी अशी अदितीची इच्छा असते.
१२ वर्षांपूर्वी ‘वचन दिले तू मला’ या स्टार प्रवाहच्या मालिकेत आसावरी जोशी यांनी भूमिका साकारली होती. स्वाभिमान मालिकेच्या निमित्ताने त्या पुन्हा एकदा स्टार प्रवाहशी जुळल्या गेल्या आहेत. या मालिकेतील भूमिकेविषयी सांगताना आसावरी जोशी म्हणाल्या, ‘खूप वर्षांनंतर मी मराठी टेलिव्हिजनवर कमबॅक करत आहे. हिंदीमध्ये काम करत असल्यामुळे मराठी इण्डस्ट्रीचा संपर्क काहीसा तुटला होता. मात्र स्टार प्रवाहच्या स्वाभिमान मालिकेच्या निमित्ताने मनासारखं प्रोजेक्ट मिळाल्यामुळे मी ही भूमिका स्वीकारली. ही व्यक्तिरेखा साकारताना मला माझ्या कॉलेजमधल्या प्रोफेसर गोरे मॅडम यांची खूप आठवण झाली.’
त्या पुढे म्हणाल्या ‘माझं शिक्षण रुपारेल कॉलेजमध्ये झालं. मी कलाशाखेत असल्यामुळे लॉजिक विषय शिकवण्यासाठी गोरे मॅडम होत्या. गोरे मॅडमचं मला खूप मार्गदर्शन मिळालं. मी अजूनही त्यांच्या संपर्कात आहे. कॉलेजमध्ये असताना त्या माझ्या आदर्श होत्या आणि आता मी मालिकेत प्रोफेसरच्या भूमिकेत दिसणार आहे आणि मालिकेच्या मुख्य नायिकेची मी आदर्श आहे ही गोष्ट मी त्यांना फोन करुन आवर्जून कळवली. त्यांना अतिशय आनंद झाला. मालिकेत अदिती आता जे पल्लवीसाठी करते आहे ते खऱ्या आयुष्यात गोरे मॅडमनी माझ्यासाठी केलं होतं. त्यामुळे अदिती ही व्यक्तिरेखा माझ्यासाठी खूप खास आहे. स्वाभिमान मालिकेचा विषय खूपच वेगळा आहे. या मालिकेत नाट्य आहे, उत्कंठा आहे यामध्ये शिकण्यासारख्या खूप गोष्टी आहेत. त्यामुळे प्रेक्षकांनी पहिल्या भागापासून ही मालिका पहावी हीच इच्छा आहे.’
‘स्वाभिमान...शोध अस्तित्वाचा’ ही मालिका स्टार प्रवाहवर २२ फेब्रुवारी पासून प्रसारित होणार आहे.
हेही वाचा - मिस इंडिया २०२० रनरअप मन्या सिंग वडिलांच्या रिक्शातून पोहोचली सत्कार समारंभाला
