मुंबई - सध्याच्या नकारात्मक वातावरणात एखादी आनंदाची बातमी मन प्रसन्न करते. गवळी आणि वाघमारे कुटुंबांत सध्या आनंदाचे वातावरण आहे. योगिता गवळी, जिचा अभिनेता अक्षय वाघमारे सोबत प्रेमविवाह झाला होता, आता आई बनली आहे. नुकताच तिने एका कन्यारत्नाला जन्म दिला.
‘डॅडी’ अरुण गवळी झाले ‘ग्रँड-डॅडी’! अभिनेता अक्षय वाघमारे आणि योगिता गवळी यांनी गेल्या वर्षी ८ मे रोजी लग्नगाठ बांधली होती. लग्नाला वर्ष होताच दोघांनी एक आनंदाची बातमी दिली आहे. अक्षय आणि योगिताला कन्यारत्न प्राप्त झाले आहे. ७ मे रोजी बाळाचा जन्म मुंबईतील दादर येथील नर्सिंगहोम मध्ये झाला आहे. योगिता ही ‘डॅडी’ अर्थात गँगस्टर अरूण गवळी यांची मुलगी आहे. त्यामुळे अरूण गवळी ‘ग्रँड-डॅडी’ म्हणजेच आजोबा झाले आहेत. अक्षय आणि योगिताने दिलेल्या या गोड बातमीने दोन्ही कुटुंबियांच्या आनंदाला पारावर नाही.
‘डॅडी’ झाल्यावर प्रतिक्रिया देताना अक्षयच्या चेहऱ्यावरचा आनंद ओसंडून वाहत होता, या बाबत बोलताना तो म्हणाला, 'मला इतका आनंद झाला आहे की तो मी शब्दात मांडू शकता नाही. एक बाबा, वडील, ‘डॅडी’ म्हणून मी माझा प्रवास सुरु करणार आहे आणि त्यासाठी मी खूपच उत्सुक आहे. बाळ आणि योगिता दोघेही सुखरूप आहेत'. यापुढे बोलताना तो असे म्हणाला की, 'आमच्या लग्नाला वर्ष पूर्ण होणार असतानाच या गोड बातमीने हा आनंद द्विगुणित झाला आहे. कुटुंबात नवीन सदस्य आली असल्याने सर्वांच्या चेहऱ्यावर हसू उमटले आहे. इतकेच नव्हे तर मुलीचे नाव काय ठेवणार अशा प्रश्नांनी भंडावून सोडले आहे'. अक्षय आणि योगिताला झालेल्या कन्यारत्नाच्या बातमीने त्यांच्या चाहत्यांनाही आनंद झाला आहे.
