वॉशिंग्टन - हॉलिवूड स्टार टॉम क्रूझ आपला आगामी सायन्स फिक्शन चित्रपट अंतराळात शूट करणार आहे. याच्या काही बातम्या यापूर्वी प्रसिध्द झाल्या होत्या. आता या गोष्टीला नासाने संमती दिल्यामुळे टॉम क्रूझचा उत्साह वाढला आहे.
क्रूझ याला अ‌ॅक्शन चित्रपटांसाठी नावाजले जाते. त्यामुळे पहिल्यांदाच त्याच्या अ‌ॅक्शनचा जलवा अंतराळात पाहायला मिळणार आहे. रिपोर्टनुसार या चित्रपटाची कथा अंतराळावर आधारित असेल. हा एक अ‌ॅक्शन आणि अ‌ॅडव्हेन्चर्स सिनेमा असेल. टॉम क्रूझ यासाठी अ‌ॅलन मस्कची कंपनी स्पेस एक्स आणि नासासोबत बातचित करीत आहे.
हेही वाचा- बहुप्रतीक्षित क्रोमॅटीका अल्बम 'या' दिवशी होणार प्रदर्शित, लेडी गागाची घोषणा
नासाचे अ‌ॅडमिनीस्ट्रेटर जिम यांनी या बातमीला दुजोरा देताना एक ट्विट केले आहे. यात त्यांनी लिहिलंय, ''टॉम क्रूझच्या आगामी सिनेमाचे शूटिंग अंतराळात होणार असल्यामुळे नासा उत्साहात आहे.''
हा चित्रपट बनला तर पृथ्वीपासून दूर अंतराळात शूट झालेला हा पहिला चित्रपट ठरेल आणि अंतराळात जाऊन शूट करणारा टॉम क्रूझ हा पहिला अभिनेता ठरेल.
