शाहरुख खानचा 'बॉडी डबल' प्रशांत वालदे अभिनित 'प्रेमातूर'चे प्रदर्शन गेले पुढे!

शाहरुख खानचा बॉडी डबल प्रशांत वालदे अभिनित प्रेमातूर चित्रपटाचे प्रदर्शन पुढे ढकलण्यात आले आहे.

गेली अनेक दशकं शाहरुख खान सुपरस्टार आहे आणि प्रशांत वालदे गेल्या १५ वर्षांपासून त्याच्या व्यावसायिक जीवनाचा अविभाज्य भाग आहे. आता तुम्ही म्हणाल कोण हा प्रशांत वालदे? हे कसे शक्य आहे? प्रशांत हा शाहरुखचा ‘बॉडी डबल’ म्हणून फिल्म इंडस्ट्रीमध्ये कार्यरत आहे. या इंडस्ट्रीमध्ये ‘लूक अलाइक’ ‘बॉडी डबल’ आणि ‘डुप्लिकेट’ अशी सुपरस्टार्सची रूपे घेऊन फिरणारे कलाकार आहेत. त्यांना शूटिंगसाठी बोलावले जाते कारण लॉन्ग शॉट, ओव्हर द शोल्डर शॉट, फाईट सीन्स, पासिंग शॉट्स ई. साठी सुपरस्टार्स वेळ खर्ची घालत नाहीत. त्यावेळी निर्माते-दिग्दर्शक यांना या लोकांची गरज भासते.

प्रशांत वालदे हा ३-इन-१ एसआरके पॅकेज आहे. तो शाहरुख सारखा दिसतो, (लूक अलाइक), त्याची शारीरिक ठेवण एसआरके सारखीच आहे (बॉडी डबल) आणि तो शाहरुख सारखा नाचतो, फाइट्स करतो आणि तंतोतंतरित्या ‘मॅनरिझम्स’ करू शकतो (डुप्लिकेट). म्हणूनच शाहरुखने एखादा पिक्चर साइन केला की त्याची टीम प्रशांतला तयार राहण्यासाठी सांगते आणि निर्मात्यालाही त्याची कल्पना देते. प्रशांत स्वतः एक कोरियोग्राफर आहे त्यामुळे तो शाहरुख सारख्याच डान्स स्टेप्स करून रेफेरंस शॉट तयार करतो. तसेच फाइट्स असो वा लॉन्ग शॉट्स वगैरे तो शाहरुखच्या शॉट्सच्या आखणी करण्यास मदत करतो जो शाहरुख रेफेरंस शॉट म्हणून पाहतो व नंतर स्वतः परफॉर्म करतो. हे सर्व निर्माते दिग्दर्शक करीत असतात जेणेकरून लहान सहन गोष्टींसाठी शाहरुखचा वेळ वाया जाणार नाही.

शाहरुख खानचा 'बॉडी डबल' प्रशांत वालदे

प्रशांत वालदे उच्चशिक्षित कुटुंबातील असून त्याचा भाऊ आणि तो स्वतः इंजिनियर आहे व त्याचे वडील डॉक्टर आहेत. त्याला माहिती आहे की, शाहरुखचा पडता काळ येण्याअगोदरच उपजीविकेची बेगमी करून ठेवायला हवी. फिल्म इंडस्ट्रीत इतकी वर्षं वावरल्यामुळे त्याने एका चित्रपटाची निर्मिती केली आहे ज्याचे नाव आहे ‘प्रेमातूर’. याची कथा, पटकथा व संवाद प्रशांतनेच लिहिले असून तो या चित्रपटाद्वारे हिरो म्हणून अभिनय पदार्पणदेखील करीत आहे. हा चित्रपट सलमान खान च्या ‘राधे’ सोबत ‘ईद’ ला रिलीज होणार होता. परंतु कोरोनाच्या दुसऱ्या लाटेने चित्रपटसृष्टीतील बरीच वेळापत्रकं कोलमडून पडली आहेत. म्हणूनच जाड अंतःकरणाने प्रशांत वालदे ने ‘प्रेमातूर’ चित्रपटाचे प्रदर्शन पुढे ढकलले आहे.

हा एक थ्रिलर-भयपट आणि रोमँटिक चित्रपट असून प्रशांत वालदेसह हेता शाह, कल्याणी कुमारी, श्रीराज सिंग, शंतनू घोष, अमित सिन्हा, वीरसिंग आणि बिंध्या कुमारी यांच्या भूमिका आहेत. अनुग्रह एंटरटेनमेंटच्या बॅनरखाली तयार करण्यात आलेल्या 'प्रेमातूर' चे दिग्दर्शन सुमित सागर यांनी केले असून प्रशांत वालदे सोबत शंतनू घोष, सत्या आणि प्रवीण वालदे यांनी या चित्रपटाची निर्मिती केली आहे.