जेव्हा महाराष्ट्रातील चित्रपटगृहे उघडली तेव्हा मराठी चित्रपट निर्मात्यांनी आपापल्या चित्रपट प्रदर्शनाची तयारी सुरू केली. कोरोना आणि लॅाकडाऊनमुळे लांबणीवर गेलेला 'हॅशटॅग प्रेम' लवकरच प्रदर्शित होणार आहे. खरे तर हा चित्रपट अगोदर याच वर्षी १९ मार्चला प्रेक्षकांच्या भेटीला येणार होता, पण लॅाकडाऊन लागला आणि सगळीच गणिते बदलली. आता पुन्हा एकदा 'हॅशटॅग प्रेम' प्रदर्शनासाठी सज्ज झाला आहे. या चित्रपटाचा उत्कंठावर्धक ट्रेलर अगोदरच प्रदर्शित झाला असून, ट्रेलरला रसिकांचा तुफान प्रतिसाद लाभला आहे.
प्रेमाचा मूळ रंग गुलाबी असला तरी त्याच्या अनेक छटा आजवर प्रत्येकाने आपापल्या परीने अनुभवल्या आहेत. काळानुरूप प्रेम व्यक्त करण्याच्या पद्धती बदलल्या असल्या तरी मूळ प्रेमभावना आजही तिच आहे. आजचा आधुनिक काळही यात बदल घडवू शकलेला नाही. तरुणाईला जी भाषा समजते आणि जी लँग्वेज इझी वाटते त्या भाषेत आज प्रेम व्यक्त केले जात आहे. याच कारणामुळे प्रेमकथांवर आधारित चित्रपटांची टायटल्सही त्याच रंगात रंगल्याची पाहायला मिळतात. 'हॅशटॅग प्रेम' हा आगामी बहुचर्चित मराठी चित्रपट याचीच अनुभूती देणारा आहे. राजेश बाळकृष्ण जाधव यांनी मोठ्या कुशलतेने या चित्रपटाचे दिग्दर्शन केले आहे.
मिताली मयेकर आणि सुयश टिळक ही नवी कोरी जोडी आणि त्यांची केमिस्ट्री या चित्रपटाचं सर्वात मोठे आकर्षणाचे केंद्र असून, रसिकांना सिनेमागृहांपर्यंत खेचून आणण्यासाठी पुरेशी ठरणार आहे. 'हॅशटॅग प्रेम'च्या ट्रेलरमध्ये मिताली-सुयश या जोडीची केमिस्ट्री प्रेक्षकांनी अनुभवली आहे. आता चित्रपटात ही जोडी कशा प्रकारे धमाल करते हे पाहण्यासाठी प्रेक्षकांसोबतच मराठी सिनेसृष्टीही आतुरली आहे.
- " class="align-text-top noRightClick twitterSection" data="">
दिग्दर्शक राजेश बाळकृष्ण जाधव यांच्या म्हणण्यानुसार पुन्हा एकदा 'हॅशटॅग प्रेम'ची टीम नव्या जोमानं प्रदर्शनाच्या तयारीला लागली आहे. ‘प्रेम हा तरुणांपासून ज्येष्ठांपर्यंत सर्वांच्याच आवडता विषय आहे. प्रेमाला असंख्य पैलू आणि बाजू आहेत. त्यातील काही अप्रकाशित पैलू आणि त्यानिमित्तानं येणाऱ्या नातेसंबंधांवर 'हॅशटॅग प्रेम' या चित्रपटाद्वारे प्रकाश टाकण्याचा प्रयत्न करण्यात आला आहे. या चित्रपटाच्या कथेत प्रेक्षकांसाठी एक अंडरकरंट मेसेजही दडला आहे. सुमधूर गीत-संगीताचा साज लेऊन सजलेले या चित्रपटाचे आजच्या युगातील कथानक प्रेक्षकांना नक्कीच आपलंसे वाटेल यात शंका नाही,’ असे मत जाधव यांनी व्यक्त केले आहे.
दर्जेदार निर्मितीमूल्ये आणि प्रभावी कथानक हे या चित्रपटाचे सर्वात मोठे प्लस पॉइंट असून, चित्रपट पाहताना प्रेक्षकांना याचा अनुभव येईल, असे निर्माते अनिल गोविंद पाटील यांचे म्हणणे आहे. या सिनेमाची कथा-पटकथा निखिल कटारे यांनी लिहिली आहे. डीओपी राजा फडतरे यांची अफलातून सिनेमॅटोग्राफी रसिकांना भुरळ पाडणारी आहे. गीतकार संजाली रोडे आणि कौतुक शिरोडकर यांनी लिहिलेल्या गीतांना संगीतकार प्रविण कुवर यांनी संगीत दिले आहे. पार्श्वसंगीताची जबाबदारी गायक-संगीतकार रोहित राऊतने सांभाळली आहे. कला दिग्दर्शन केशव ठाकूर यांनी केले असून, महेश भारंबे या सिनेमाचे कार्यकारी निर्माते आहेत.
निर्माते अनिल गोविंद पाटील यांनी माऊली फिल्म प्रोडक्शनच्या बॅनरखाली 'हॅशटॅग प्रेम'ची निर्मिती केली असून, अरविंद गोविंद पाटील या चित्रपटाचे सहनिर्माते आहेत. वितरक समीर दीक्षित आणि ऋषिकेश भिरंगी यांच्या सहयोगाने पिकल एन्टरटेन्मेंटच्या माध्यमातून हा चित्रपट रसिकांपर्यंत पोहोचणार आहे.
'हॅशटॅग प्रेम' येत्या १७ डिसेंबर २०२१ रोजी रिलीज होणार आहे.
