मुंबई - भारताने १९९९ साली कारगिल युद्धात पाकिस्तानवर अविस्मरणीय विजय मिळवला होता. भारत आणि पाकिस्तानमध्ये तब्बल ६० दिवस हे युद्ध सुरू होते. अखेर २६ जुलैला भारताने पाकिस्तानला मात देत विजयश्री मिळवली होती. तेव्हापासून २६ जुलै हा दिवस 'कारगिल दिवस' म्हणून साजरा केला जातो.
कारगिल युद्धात भारतीय सैन्याचे ५२७ जवान शहीद झाले होते. तर, १३६३ जवान जखमी झाले होते. या युद्धाला यावर्षी २० वर्षे पूर्ण होत आहेत. कारगिल युद्धाचा थरार बॉलिवूडच्याही चित्रपटातून प्रेक्षकांसमोर उलगडण्यात आला. हे चित्रपट पाहताना प्रेक्षकांच्याही अंगावर रोमांच उभे राहतात.
एलओसी कारगिल - कारगिल युद्धाच्या तीन वर्षानंतर म्हणजे २००३ साली 'एलओसी कारगिल' हा चित्रपट प्रदर्शित झाला होता. या चित्रपटात बॉलिवूडची तगडी स्टारकास्ट झळकली होती. अजय देवगन, संजय दत्त, सैफ अली खान, अभिषेक बच्चन, करिना कपूर आणि सुनील शेट्टी यांच्या या चित्रपटात भूमिका होत्या.
लक्ष्य - हृतिक रोशनची भूमिका असलेला 'लक्ष्य' चित्रपट हा देखील कारगिल युद्धावर आधारित होता. २००४ साली हा चित्रपट प्रदर्शित झाला होत. यामध्ये प्रिती झिंटा, अमिताभ बच्चन, अमरीश पुरी आणि ओम पुरी यांच्याही भूमिका होत्या
टँगो चार्ली - अजय देवगन, बॉबी देओल आणि संजय दत्त यांची मुख्य भूमिका असलेला टँगो चार्ली हा चित्रपट २००५ साली प्रदर्शित झाला होता. या चित्रपटात कारगिल युद्धादरम्यान देशात कशाप्रकारे परिस्थिती होती, हे दाखवण्यात आले होते.
धूप - ओम पुरी आणि गुल पनाग यांची मुख्य भूमिका असलेला 'धूप' हा चित्रपट कारगिल युद्धात शहीद झालेल्या जवानांवर आधारित होता. यामध्ये जवानांची कथा दाखवण्यात आली होती.
