मुंबई - बॉलिवूडचा अॅक्शन हिरो अक्षय कुमार 'सूर्यवंशी' चित्रपटात भूमिका साकारणार आहे. दिग्दर्शक रोहित शेट्टीसोबत तो पहिल्यांदाच या चित्रपटाच्या निमित्ताने काम करत आहे. त्याच्या 'सिंबा' चित्रपटातच अक्षयच्या 'सूर्यवंशी' चित्रपटाची झलक पाहायला मिळाली होती. त्यामुळे चाहत्यांना 'सूर्यवंशी' चित्रपटाची आतुरता आहे.
या चित्रपटाच्या शूटिंगसाठी सध्या अक्षय बँकॉकला गेला आहे. येथील शूटिंगदरम्यानचा एक फोटो सोशल मीडियावर शेअर करण्यात आला आहे. रोहित शेट्टी हा अॅक्शन चित्रपटांसाठी ओळखला जातो. त्यामुळे त्याच्या चित्रपटात थरारक स्टंट, अॅक्शन आणि भरपूर गाड्या पाहायला मिळतात. अक्षय कुमारच्या या फोटोतही अक्षय कुमार बाईकवरून स्टंट साकारताना दिसतोय. बँकॉकच्या रस्त्यावरून वेगवेळ्या गाड्यांमधून तो बाईक चालवताना दिसत आहे.
अक्षय कुमारसोबत या चित्रपटात कॅटरिना कैफदेखील झळकणार आहे. अक्षय या चित्रपटात पोलिस अधिकाऱ्याच्या भूमिकेत पाहायला मिळणार आहे. पुढील वर्षी हा चित्रपट प्रदर्शित होईल.
अलिकडेच अक्षयने 'केसरी' चित्रपटात भूमिका साकारली होती. या चित्रपटाला बॉक्स ऑफिसवरही चागला प्रतिसाद मिळाला. तर, कॅटरिनाची भूमिका असलेला 'भारत' चित्रपट उद्या म्हणजे ५ जूनला प्रदर्शित होतोय.
