२००३ साली प्रदर्शित झालेल्या प्रियदर्शन दिग्दर्शित ‘हंगामा’ने बॉक्स ऑफिसवर चांगलाच हंगामा केला होता त्यामुळे त्याचा सिक्वेल तर बनणारच ना. अपेक्षेप्रमाणे, कोरोना संकट येण्याअगोदर, ‘हंगामा २’ ची अनाउन्समेंट झाली होती. परंतु कोरोना, लॉकडाऊन, शूट-बंदी यामुळे चित्रपटाच्या प्रारंभाला विलंब झाला. परंतु गेल्यावर्षी अनलॉकच्या पहिल्याच फेजमध्ये या चित्रपटाच्या चित्रीकरणाला सुरुवात झाली आणि शूट संपून पोस्ट-प्रॉडक्शन सुरु असल्याचे समजतेय. त्यातच ‘हंगामा २’ च्या निर्मात्यांनी अधिकृतपणे जाहीर केले की त्यांचा चित्रपट ओटीटी प्लॅटफॉर्मवर प्रदर्शित होणार आहे.
खरंतर ‘हंगामा २’चे निर्माते हा चित्रपट चित्रपटगृहांत प्रदर्शित करण्याची तयारी करत होते परंतु कोरोनाच्या आलेल्या दुसऱ्या लाटेने त्यांच्या मनसुब्यांवर पाणी फिरविले. या महाभयंकर महामारीच्या दुसऱ्या फेऱ्यात अनेक राज्ये अडकली आणि त्यांनी लॉकडाऊन जाहीर केला जेणेकरून सर्व चित्रपटगृहे बंद ठेवण्यात आली. त्यातच हा जीवघेणा आजार इतक्यात गाशा गुंडाळण्याची चिन्हे नाहीत त्यामुळे बरेच निर्माते चित्रपट प्रदर्शनासाठी पुन्हा डिजिटल माध्यमाकडे वळताना दिसत आहेत. त्यामुळेच निर्माते रतन जैन यांनी घोषणा केलीय की त्यांचा चित्रपट ‘हंगामा २’ हा देखील ओटीटी प्लॅटफॉर्मवर प्रदर्शित होईल.
सध्याची बिकट परिस्थिती लक्षात घेऊन निर्माते रतन जैन यांनी पुष्टी केली की कौटुंबिक करमणूक असलेला ‘हंगामा २’ यावर्षी ओटीटी प्लॅटफॉर्मवर प्रदर्शित करण्यात येईल. एका अधिकृत निवेदनात रतन जैन म्हणाले, "हंगामा २ हा एक नर्मविनोदी, हलक्या-फुलक्या मनोरंजनाने भरलेला चित्रपट आहे ज्याचा आनंद सर्व वयोगटातील प्रेक्षक आनंद घेऊ शकतील. या कठीण काळात हा चित्रपट प्रेक्षकांचे मनोरंजन तर करेलच परंतु त्यांच्या आजूबाजूच्या निगेटिव्हिटीला संपुष्टात आणेल. आम्ही हा चित्रपट डिजिटली प्रदर्शित करीत आहोत आणि प्रेक्षक स्वतःच्या घरात बसून याचा आस्वाद घेऊ शकतील. आम्ही हा चित्रपट प्रेमाने आणि मेहनतीने बनविला असून तो प्रेक्षकांच्या चेहऱ्यावर हास्य उमटवेल याची आम्हाला खात्री आहे.”
व्हीनस रेकॉर्डस अँड टेप्स एलएलपी प्रोजेक्ट, हंगामा २ ची निर्मिती रतन जैन, गणेश जैन, चेतन जैन आणि अरमान वेंचर्स यांनी केली आहे. यात मीझान, प्रणीता सुभाष, परेश रावल आणि शिल्पा शेट्टी कुंद्रा यांच्या मुख्य भूमिका आहेत. प्रियदर्शन यांनी या चित्रपटाचे दिग्दर्शन केले असून यात आशुतोष राणा, मनोज जोशी, राजपाल यादव, जॉनी लीव्हर आणि टिकू तलसानिया यांनी महत्त्वपूर्ण भूमिका केल्या आहेत.
या चित्रपटाचे संबंधित एका शीर्ष ओटीटी प्लॅटफॉर्म बरोबर चर्चा करीत असून ती अंतिम टप्प्यात आहे आणि यावर्षी लवकरच ‘हंगामा २’ हा चित्रपट प्रेक्षकांच्या ‘होम स्क्रीन’ वर झळकेल.
हेही वाचा - द फॅमिली मॅन २' चे प्रसारण थांबवा अन्यथा होणाऱ्या परिणामाला सरकार जबाबदार - वायको
