मुंबई - सध्याच्या घडीला खळखळून वाहत्या झऱ्यासारख्या वागणारा अभिनेता एकच आहे, रणवीर सिंग. त्याच्याबाबतीत असं म्हणता येईल की, तो आला, त्यानं पाहिलं आणि आपल्या एनर्जीने सर्वांना जिंकलं. यात प्रेक्षक तर आलेच परंतु फिल्म इंडस्ट्री मधील निर्माते दिग्दर्शक हिरॉइन्स आणि हिरोज् सुद्धा आहेत. प्रत्येकजण रणवीरच्या निरागस मस्तीचे चाहते आहेत. ६ जुलै अर्थात आज रणवीरचा जन्मदिवस आहे. त्यानिमित्ताने 'ईटीव्ही भारत'कडून रणवीरला वाढदिवसाच्या शुभेच्छा...
एनर्जेटिक रणवीर
मराठी चित्रपटसृष्टीमधील सिद्धार्थ जाधव याला एनर्जीची खाण म्हणतात परंतु तो म्हणतो की रणवीर सिंग ‘एनर्जी उत्पादन केंद्र’ आहे. माझी एनर्जी त्याच्यापुढे फिकी आहे. रणवीर मराठी कलाकारांचा आदर करतो. त्यांच्या मते रणवीर जितका चांगला अभिनेता आहे त्याहूनही जास्त चांगला माणूस आहे. परंतु, रणवीरने सुरुवातीला खूप स्ट्रगल केलं. अनेक ठिकाणी नकारघंटा ऐकून तो निराश व्हायचा. परंतु त्याने जिद्द सोडली नाही. जेव्हा तो त्याचा पहिला चित्रपट ‘बँड बाजा बरात’ करीत होता, ज्याची यशराज फिल्म्स निर्मिती करीत होती, त्यावेळी शूटिंगला करण जोहर आला होता. रणवीर ला पाहून तो त्याच्या ढंगात बोलला होता की, ‘ये हिरो हैं?’ आणि नाक मुरडून निघून गेला होता. आजच्या घडीला रणवीर सिंग करण जोहरचा लाडका नट आहे. ‘सूर्यवंशी’ च्या ट्रेलर लाँचवेळी त्याने भर समारंभात आपल्या मिश्किल अंदाजात सांगितले की, “रोहित (शेट्टी) ने अजय (देवगण), मी आणि आता अक्कीभाईला (अक्षय कुमार) घेऊन मी चित्रपट बनवलेत. आता तो त्याच्या ‘पोलीस युनिव्हर्स’ चा पुढचा भाग काढतोय आणि त्यात ‘कडक इन्स्पेक्टर’ची प्रमुख भूमिका करण जोहर करणार आहे.” करण जोहरची ‘चाल’ आठवत सर्वजण खळखळून हसले. दुसरीकडे रणवीर प्रांजळपणे बोलला की, “मला कल्पना आहे की काही मदनाचा पुतळा नाही. बँड बाजा बरात करीत असताना आदित्य चोप्राही मला म्हणाला होता की, ‘तुझा चेहरा पोस्टरवर लावण्याइतपत ग्रेट नाहीये. परंतु, मी तुला तुझा अभिनय पाहून निवडले’.
असा मिळाला 'सिंबा' चित्रपट
मला रोहित शेट्टी सोबत काम करण्याची मनीषा होती. तो मला इतक्यात बोलावेल ही शक्यता कमीच होती. मी संधीची वाट पाहत होतो. तेव्हड्यात माझ्याकडे जी जाहिरात होती त्यांना सिनेमा धर्तीवर मारधाड असणारी ‘लॅव्हिश’ ऍड हवी होती. त्यांचे बजेटही तगडे होते. मी सरळ रोहित शेट्टी कडे गेलो आणि सांगितले की ही ऍड फक्त तूच करू शकतो आणि बजेटचीही चिंता नाहीये. आम्ही ती ऍड केली आणि ती प्रचंड गाजली. त्याच सुमारास रोहित ने सांगितले की माझ्याकडे एक कथा आहे. तू करशील का? मी ताबडतोब होकार दिला. तो म्हणाला ‘अरे आधी स्टोरी तर ऐक’. मी म्हणालो मला स्टोरीत इंटरेस्ट नाही, तुझ्याबरोबर काम करण्यात इंटरेस्ट आहे. आणि तू चित्रपट बनविणार म्हणजे चांगलाच बनविणार. तारखा कुठल्या देऊ? ....आणि ‘सिम्बा’ जन्माला आला.”रणवीर सिंग नजीकच्या काळात यशराज फिल्म्सच्या ‘जयेशभाई जोरदार’ मध्ये दिसेल. तसेच तो रोहित शेट्टी बरोबर अजून एक सिनेमा करतोय, ‘सर्कस’. त्याचबरोबर त्याचे ‘८३’, ‘सूर्यवंशी’ प्रदर्शनाची वाट पाहत आहेत. रणवीर सिंग ला ईटीव्ही भारत मराठी कडून वाढदिवसाच्या हार्दिक शुभेच्छा!
हेही वाचा - TOOLKIT आवडत नसल्यास दुर्लक्ष करा, सर्वोच्च न्यायालयाचा याचिकाकर्त्याला सल्ला
