बगदाद - इराकमध्ये गोळीबार होऊन २५ जण ठार तर, १३० जखमी झाल्याची माहिती अधिकृत सूत्रांनी दिली आहे. एका बंदूकधारी व्यक्तीने बगदादमध्ये सरकारविरोधी निदर्शने करणाऱ्यांवर गोळीबार केला. शनिवारी ही घटना घडली.
येथे शुक्रवारी संध्याकाळीही अज्ञात बंदूकधाऱ्यांनी अल-खलानी स्क्वेअर येथे सामान्य नागरी वाहनांमधून येऊन अचानकपणे निदर्शकांवर अंदाधुंद गोळीबार करण्यास सुरुवात केली होती. हा गोळीबार शनिवारी सकाळपर्यंत सुरू होता, असे वृत्त हिल या वृत्तसंस्थेने दिले आहे.
या हल्ल्यामुळे निदर्शकांमध्ये पळापळ होऊन त्यांनी आजूबाजूच्या इमारती आणि मशिदींमध्ये आसरा घेतला. ऑक्टोबरच्या सुरुवातीपासून इराकमध्ये सरकारविरोधी निदर्शने सत्त सुरू आहेत. लोक निषेधासाठी रस्त्यावर उतरत आहेत.
आर्थिक सुधारणा कराव्यात, जगण्यासाठी चांगली स्थिती निर्माण होण्यासाठी योग्य पावले उचलावीत, सामाजिक कल्याण आणि भ्रष्टाचार संपवण्याच्या दृष्टीने पावले उचलावीत, अशा या निदर्शकांच्या मागण्या आहेत.
