मुंबई - प्रत्येक चित्रपट बनत असताना अनेक किस्से घडत असतात. सातारचा सलमानच्या चित्रिकरणावेळीदेखील एक 'रंगीबेरंगी' किस्सा घडला. 'सातारचा सलमान' हा चित्रपट लवकरच प्रदर्शित होणार आहे. त्याचे दिग्दर्शक हेमंत ढोमे यांनी एका गाण्याच्या चित्रीकरणासाठी संपूर्ण गावाला रंगवून काढल्याची अनोखी गोष्ट घडली आहे. या रंगरंगोटी विषयी सांगताना ते म्हणाले की, 'सातारचा सलमान' या चित्रपटात एक धमाल गाणे आहे जे सुयोग गोऱ्हे, सायली संजीव, शिवानी सुर्वे, अक्षय टांकसाळे, यांच्यावर चित्रीत करण्यात आले आहे. अत्यंत जोषपूर्ण असलेल्या या गाण्यात एकंदरच रंगीबेरंगी वातावरण, आजूबाजूला पारंपरिक पोशाखात जल्लोषात नाचणारे गावकरी, सुयोगचा उत्स्फूर्त नाच आणि त्याला इतर कलाकारांनी दिलेली उत्तम साथ एकंदरच सगळं मस्त जुळून आले आहे. परंतु हे करण्यासाठी खूप कष्ट घ्यावे लागले.'
- " class="align-text-top noRightClick twitterSection" data="">
त्यांचं झालं असं की हेमंत ढोमे यांच्या डोक्यात हे गाणे चित्रित करण्यापूर्वी काही कल्पना रुंजत होत्या. हे गाणे सिनेमाचा हायलाईट ठरू शकत असल्यामुळे ढोमेंना बॅकग्राऊंड रंगीबेरंगी हवी होती. आता गावाकडल्या घरांना तशी आकर्षकता असण्याची शक्यताच नव्हती. त्यामुळे मग असे ठरले गेले की गाण्यात रंगीबेरंगीपणा आणण्यासाठी तेथील घरे सुद्धा रंगीबेरंगी असावीत. मग प्रॉडक्शन च्या खर्चाने तेथील घरांना रंग देण्याचे ठरले. परंतु या गोष्टीसाठी गावकऱ्यांना तयार करणे आवश्यक होते. ते याला तयार होतील की नाही ही शंका होती.
मग गावकऱ्यांची मीटिंग घेतली गेली आणि आश्चर्य म्हणजे त्यांनी ताबडतोब संमती दिली. गावाच्या चौकातल्या सगळ्या घरांना वेगवेगळे रंग देण्याचे ठरवले होते त्याप्रमाणे ते काम सुरू झाले. त्याही पुढे जाऊन गावकरी उस्फुर्तपणे येऊन सांगत होते की, आमच्या घराला अमुक अमुक रंग लावा. गावकऱ्यांच्या संमतीने कोणाच्या घराला हिरवा रंग, कोणाच्या घराला पिवळा रंग असे निरनिराळे रंग देण्यात आले. त्यामुळे झाले असे की संपूर्ण गाव रंगीबेरंगी झाले. प्रत्येकाने आपापल्या आवडीनुसार घरांना रंग लावून घेतला आणि दिग्दर्शकाला जे अपेक्षित होते ते गाण्यात उतरले. किंबहुना आताही ते गाव रंगीबेरंगी आणि आकर्षक दिसत असून त्यांनी 'सातारचा सलमान' च्या टीमला मनःपूर्वक शुभेच्छा दिल्या आहेत. आजही साताऱ्यात केंजळ या गावात तुम्ही गेलात तर ही रंगीबेरंगी घरे पाहायला मिळतात.
'सातारचा सलमान' या चित्रपटात सुयोग गोऱ्हे, सायली संजीव, शिवानी सुर्वे, अक्षय टांकसाळे यांच्यासह मकरंद देशपांडे, आनंद इंगळे यांच्याही प्रमुख भूमिका आहेत. 'सातारचा सलमान' हा चित्रपट येत्या ३ मार्च रोजी प्रेक्षकांच्या भेटीला येत आहे.
हेही वाचा - Aha Hero Song Released : आकाश ठोसर आणि सयाजी शिंदेचा नवा धमाका, आहा हिरो गाणे रिलीज
