ठाणे - भाऊबीज हा बहीण आणि भावाच्या नाते अधिक घट्ट करणारा सण मानला जातो. यंदा, मात्र देशभरात करोनाचे संकट असल्यामुळे भाऊबीज एकत्रितपणे साजरे करण्यावर मर्यादा आल्या आहेत. बिहारला गावी जाता आले नाही म्हणून, एका भावाने डोक्यावरील केसात 'हॅपी भाईदुज' असे अक्षर कोरून सोशल मीडियाच्या माध्यमातून दोन्ही बहिणींचा आशीर्वाद घेतला. शंकरकुमार साहू असे या तरुणाचे नाव आहे.
शंकर साहू हे मूळचे बिहार राज्यातील गया जिल्ह्याचे रहिवाशी आहेत. ते भिवंडीतील खासगी कंपनीत सुरक्षा रक्षकाचे काम करतात. भिवंडीतील हनुमान नगर परिसरात गेल्या ९ वर्षांपासून साहू राहतात.
बहिणीच्या आठवणीने झाला भावुक -
शंकरकुमार यांना तीन बहिणी आहेत. त्यापैकी दोघीही बिहारमधील गया जिल्ह्यात राहतात. तर एका बहिणीचे निधन झाले. शंकरकुमार सांगतात की, भिवंडीत वर्षभर काम करीत असताना केवळ मूळगावी बहिणीसोबत दिवाळी साजरी करणासाठी दरवर्षी जात होतो. यंदा कोरोनाच्या संकटामुळे जाता आले नाही. त्यामुळे बहिणींना शुभेच्छा देण्यासाठी 'हॅपी भाईदुज' अक्षरे कोरली आहेत. व्हिडिओ कॉलिंग करून बहिणींचे आशीर्वाद घेतल्याचे त्यांनी भावूक होऊन सांगितले.
