पुणे - देशासह राज्यात असलेल्या कोरोना स्थितीच्या पार्श्वभूमीवर रेल्वे सेवा बंद आहे. मात्र, पुण्यातील अनेक चाकरमान्यांना कामावर जाण्यासाठी अडचणींचा सामना करावा लागत आहे. यामुळे पुणे ते मुंबई रेल्वे सेवा पूर्ववत होत नाही, तोपर्यंत डेक्कन क्वीन सुरू करावी, अशा आशयाचे निवेदन पिंपरी-चिंचवड रेल्वे प्रवाशी संघाचे अध्यक्ष इकबाल मुलाणी यांनी मुख्यमंत्री उद्धव ठाकरे यांना दिले आहे.
पुणे आणि पिंपरी-चिंचवड शहरातून मुंबईला नोकरी करणाऱ्यांची संख्या दीड हजारावर आहे. कोरोनाच्या अगोदर परिस्थिती वेगळी होती. हे सर्व नोकरदार सिंहगड एक्सप्रेस, डेक्कन क्विन, प्रगती एक्सप्रेस, सह्याद्री एक्सप्रेस तसेच नांदेड पनवेल एक्सप्रेस या गाडयांनी मुंबईहून ये-जा करत असत. मात्र कोरोनामुळे परिस्थती बदलली असून गेल्या मार्च महिण्यापासून रेल्वे सेवा बंद आहे. परंतु, लॉकडाऊन शिथिल करण्यात आल्यानंतर अनेक नोकरदारांना उपस्थित राहणे बंधनकारक केले असून रेल्वे सेवा बंद असल्याने अनेक अडचणींना सामोरे जावे लागत आहे. असे मुलाणी यांनी सांगितले. अनेक प्रवासी जीव मुठीत घेऊन पुणे- मुंबई हा प्रवास दुचाकीवरून करत असल्याचेही त्यांनी सांगितले. तसा उल्लेख त्यांनी निवेदनात केला आहे. दरम्यान, मुख्यमंत्री उद्धव ठाकरे यांच्यासह रेल्वेशी संबंधित अधिकाऱ्यांना त्यांनी निवेदन दिले आहे. त्यामुळे याच्यावर लवकरात लवकर विचार करावा, अशी मागणी रेल्वे प्रवाशी संघ पिंपरी-चिंचवडने केली आहे.
मुंबईमध्ये अत्यावश्यक सेवेतील कर्मचाऱ्यांना रेल्वे सेवा आणि मुंबईमधील उपनगरात राहत असलेल्या अत्यावश्यक सेवेतील नोकरदारांनाही रेल्वे सेवा काही अटी आणि शर्थीसह सुरू करण्यात आली आहे. मात्र, पुणे आणि पिंपरी-चिंचवडमधील नागरिकांना रेल्वे अभावी अडचणींना सामोरे जावे लागत आहे. यामुळे सकाळी 06:30ला सुटणारी आणि 05:30ला परतणारी डेक्कन क्वीन सुरू करण्यात यावी, अशी विनंती मुख्यमंत्री यांना निवेदना द्वारे करण्यात आली आहे. त्यामुळे येणाऱ्या काही दिवसांमध्ये पिंपरी-चिंचवडकर आणि पुण्याच्या या मागणीचा विचार केला जातो का? याकडे सर्वांचे लक्ष असेल. हे पाहावे लागणार आहे.
