पुणे - पाच महिन्यांहून अधिक काळ लॉकडाऊनमुळे नाट्यगृहांसह विविध सांस्कृतिक केंद्रे बंद आहेत. कार्यक्रम होत नसल्याने कलाकार अडचणीत आहेत. त्यांना या अडचणीतून बाहेर काढण्यासाठी सरकारने नाट्यगृहे आणि सांस्कृतिक केंद्रे त्वरित सुरू करावीत, या मागणीसाठी आज बालगंधर्व रंगमंदिर येथे नृत्य परिषद महाराष्ट्रच्यावतीने आंदोलन करण्यात आले.
पुणे हे सांस्कृतिक माहेरघर असून कोरोनामुळे बेरोजगार झालेल्या पुण्यातील लावणी, लोकधारा, नाट्य-सिने, एकपात्री, जादूगर, नृत्य, साऊंड लाइट, बॅक स्टेज कलाकार तसेच लोककलावंतांवर आज उपासमारीची वेळ आली आहे. शासनाने सांस्कृतिक कार्यक्रमांना परवानगी द्यावी, हाताला काम द्या खिशाला दाम द्या, या मागण्यांसाठी आज हे आंदोलन करण्यात आलं, अशी माहिती नृत्य परिषदेचे अध्यक्ष मेघराज राजेभोसले यांनी दिली आहे.
गेल्या 5 महिन्यांपासून विविध संस्था, संघटनांच्यावतीने कलाकारांना मदत करण्यात आली आहे. शासनाला मनोरंजन कार्यक्रमातून कर रुपात मोठं उत्पन्न मिळत असते. शासनाने जबाबदारी म्हणून या कलाकारांच्या मागे उभे राहायला हवं. या पाच महिन्यांमध्ये अनेक सण-उत्सव येऊन गेले. निदान या कलाकारांना नवरात्रीचे कार्यक्रम तरी मिळावेत, अशी अपेक्षाही यावेळी मेघराज राजेभोसले यांनी व्यक्त केली.
नृत्यावर अवलंबून असलेल्या कलावंतांनी जगायचं कसं? जत्रा गेल्या, यात्रा गेल्या, सांगा आम्ही पोट भरायचं कस? असे विविध फलक घेऊन या कलाकारांनी आंदोलन केले.
