पुण्यात - पुण्यात महिला अत्याचाराच्या घटना वाढत असतानाच आणखी दोन घटना पुढे आल्या आहेत. पुण्यात काल पीएमपीएलच्या वाहकाने अल्पवयीन तरुणीचा विनयभंग केल्याची घटना घडली. तर, एका हॉटेलच्या पार्किंगमध्ये एका 19 वर्षीय तरुणीवर अश्लील कृत्य झाल्याचे समोर आले आहे.
हेही वाचा - विद्यार्थ्यांच्या उन्हाळी सुट्ट्या रद्द, रविवारी देखील शाळा सुरू ठेवण्याचा शिक्षण विभागाचा निर्णय
पीएमपीएलच्या वाहकाने केला विनयभंग : पुण्यात काल दुपारी पीएमपीएलच्या वाहकाने एका 17 वर्षीय अल्पवयीन तरुणीचा विनयभंग केल्याची घटना घडली. या प्रकरणी अल्पवयीन फिर्यादीच्या सांगण्यावरून बंडगार्डन पोलीस स्टेशनमध्ये गुन्हा दाखल करण्यात आला आहे. प्रशांत किसन गोडगे, असे गुन्हा दाखल करण्यात आलेल्या वाहकाचे नाव असून, पोलिसांनी त्याला अटक केली आहे.
पोलिसांनी दिलेल्या माहितीनुसार, फिर्यादी तरुणी ही काल दुपारी स्वारगेट ते विश्रांतवाडी या मार्गाने पीएमपीएलने प्रवास करत होती. या प्रवासादरम्यान पहिल्यांदा वाहक तिच्या बाजूला थांबून तिच्यावर जोरात ओरडला, पण तरुणीने काहीच न बोलता ती बाजूला जाऊन उभी राहिली. आणि थोड्या वेळाने बसमध्ये आलेल्या तिकीट चेकरकडे त्या वाहकाची तक्रार केली.
तिकीट चेकर निघून गेल्यानंतर त्या तरुणीविषयीचा राग मनात धरून आरोपीने पहिल्यांदा तिच्या कमरेला हात लावला आणि नंतर पुन्हा तीन वेळेस आरोपीने हाच प्रकार केला. त्यानंतर घाबरलेल्या तरुणीने बंडगार्डन पोलीस स्टेशन गाठून घडलेल्या सगळ्या प्रकाराबाबत तक्रार नोंदवली. पोलिसांनीही या प्रकरणी गुन्हा दाखल करीत आरोपीला तातडीने अटक केली आहे.
पुण्यातील हॉटेलच्या पार्किंगमध्ये तरुणीवर अश्लील कृत्य : पुण्यातील बंडगार्डन पोलrस स्टेशनच्या हद्दीत असलेल्या हॉटेलच्या पार्किंगमध्ये एका 19 वर्षांच्या तरुणीवर अश्लील कृत्य झाल्याची घटना घडली आहे. पार्किंगमध्ये पहाटे अडीच ते तीनच्या दरम्यान ही घटना घडली असून, आरोपीने तरुणीचा हात पिरगाळत तिला मारण्याचा देखील प्रयत्न केला.
13 मार्च रोजी पहाटे अडीच वाजता ही घटना घडली असून, या प्रकरणी बंडगार्डन पोलीस स्टेशनमध्ये 19 वर्षीय तरुणीने फिर्याद दिली आहे. या फिर्यादीवरून, आरोपी ओहनसिंग सहानी याच्या विरोधात गुन्हा दाखल करण्यात आला आहे.
बंडगार्डन पोलिसांनी दिलेल्या माहितीनुसार, घटनेच्या दिवशी फिर्यादी तरुणी ही रात्री जेवण करून हॉटेलच्या पार्किंगमध्ये आपल्या मित्रांसोबत थांबली होती. त्याचवेळी पार्किंगमध्ये त्यांच्या बाजूला आठ ते दहा जण भांडण करत होते. त्याचवेळी आरोपी फिर्यादी तरुणीच्या जवळ आला आणि त्याने तिचा डावा हात धरून तिला जवळ ओढले आणि तिच्यासोबत अश्लील कृत्य केले. फिर्यादीच्या मित्राने त्याला विरोध केला असता, आरोपीने त्याला मारहाण करत शिवीगाळ केली. 13 मार्च रोजी घडलेल्या घटनेनंतर फिर्यादीने अखेर बंडगार्डन पोलीस स्टेशनमध्ये धाव घेऊन तक्रार दिली. पोलिसांनी या प्रकरणी गुन्हा दाखल केला असून पोलीस उपनिरीक्षक गोरड अधिक तपास करत आहे.
हेही वाचा - VIDEO : पाणीटंचाईच्या विरोधात पुण्यात राष्ट्रवादीचे घंटानाद आंदोलन
