पणजी - माजी मुख्यमंत्री दिगंबर कामत आजपासून विरोधी पक्षनेतेपदाची धुरा सांभाळणार आहेत. काँग्रेस विधिमंडळ पक्षाचे नेते म्हणून कामत यांची निवड अखिल भारतीय काँग्रेसने (एआयसीसी) मंजूर केली आहे. त्यानंतर बुधवारी उशिरा काँग्रेसने आपला विरोधी पक्षनेता जाहीर केला.
काँग्रेसचे विरोधी पक्षनेते असलेले बाबू कवळेकर यांनी भाजपमध्ये प्रवेश केला आहे. त्यांनी भाजपमध्ये प्रवेश केल्याने हे पद रिकामे झाले होते. काँग्रेसमध्ये असलेल्या 5 आमदारांपैकी 4 जण माजी मुख्यमंत्री असल्याने ही माळ कोणाच्या गळ्यात पडते, याविषयी सर्वांनाच उत्सुकता होती. तर विरोधी पक्ष बनण्यासाठी 4 आमदारांची गरज होती.
आज सभागृहात उपस्थित राहण्यासाठी आलेल्या कामत यांना याबाबत विचारले असता ते म्हणाले, विरोधी पक्षनेता ही एक आव्हानात्मक जबाबदारी आहे. अन्य विरोधी पक्षांशी समन्वय साधणे, ही आमच्या पक्षाची जबाबदारी आहे. या पदासाठी माझी निवड राहुल गांधी यांनी केल्याबद्दल मी त्यांचा आभारी आहे.
दरम्यान, आठवड्यापूर्वी सत्तेत असलेल्या गोवा फॉर्वर्डचे पक्षाध्यक्ष तथा फातोर्डयाचे आमदार विजस सरदेसाई यांनीही आपण सन्मानाने विरोधी पक्ष म्हणून विधानसभेत बसणार आहोत आणि गोमंतकियांचे प्रश्न उपस्थित करत राहणार, असे म्हटले होते. त्यामुळे या दोन्ही पक्षांच्या नेत्यांच्या कामगिरीकडे सर्वांचेच लक्ष असेल.
