नागपूर - शहरात एमडी ड्रग्सची तस्करी करणाऱ्या टोळीला सक्करदरा पोलिसांनी जेरबंद केले आहे. यामध्ये ७ आरोपींचा समावेश आहे. पोलिसांनी आरोपींकडून एमडी ड्रग्ससह ५ लाख ८८ हजार रुपयाचा माल जप्त करण्यात आला आहे. मुख्य सूत्रधाराच्या शोध सुरु आहे.
शहरातील सक्करदरा पोलीस स्टेशनच्या हद्दीत काही लोक एमडी ड्रग्ज घेत असल्याची बातमी पोलिसांना मिळाली होती. त्यानंतर पोलिसांनी त्यांना अटक करण्यासाठी सापळा रचला होता. पोलिसांना मिळालेली माहिती खरी आहे, असे कळल्यावर पोलिसांनी छापा टाकत एमडी ड्रग्सची तस्करी करणाऱ्या टोळीचा पर्दाफाश केला.
एका कारमधून ही तस्करी केली जात होती. याप्रकरणी, पोलिसांनी सात आरोपींना अटक केली आहे. त्यांच्या जवळ ५ लाख रूपये किमतीचा १९.४६ ग्रॅम एमडी ड्रग्ज आढळून आला आहे. हे ड्रग्स छोट्या प्लास्टिकमध्ये पॅक केले होते आणि त्याची डिलिव्हरी शहरातच एका ठिकाणी केली जाणार होती. मात्र, पोलिसांना याची कुणकुण लागताच या टोळीचा पर्दाफाश झाला आहे. पोलीस आता मुख्य सूत्रधाराचा शोध घेत आहे.
या प्रकरणातील आरोपींवर याआधीही अनेक गुन्हे दाखल झाल्याची माहिती पोलिसांनी दिली आहे. या आधीही त्यांनी व्यवसाय केला आहे. पोलीस आता त्यांची सखोल चौकशी करत आहेत.
